ပြည်တွင်းကအသေးစား၊ အလတ်စားအထည်ချုပ်လုပ်ငန်း တွေကို မြှင့်တင်ဆောင်ရွက်နိုင်ဖို့နဲ့နိုင်ငံတကာ ဈေးကွက် ချိတ်ဆက်ဆောင်ရွက်နိုင်ဖို့ ၂၀၂၅ မြန်မာအပြည်ပြည်ဆိုင်ရာ အထည်ချုပ်နှင့် စက်ယန္တရား ကုန်စည်ပြပွဲ (2025 Myanmar International Textile And Machinery Fair) ကို ရန်ကုန်မြို့ Inya Lake Hotel ၊ Yangon Convention Center မှာ ကျင်းပြုလုပ်နေပါတယ်။
ပြပွဲကို တရုတ်နိုင်ငံ Zhejiang ပြည်နယ် ကူးသန်းရောင်းဝယ်ရေးဦးစီးဌာနရဲ့ပံ့ပိုးကူညီမှုနဲ့ မြန်မာနိုင်ငံအထည်ချုပ်လုပ်ငန်းရှင်များအသင်း(MGMA)၊ Chinese Textile & Garment Association (CTGA)တို့ ပူးပေါင်းကာတရုတ်-မြန်မာနှစ်နိုင်ငံအထည်အလိပ်နှင့် အထည်ချုပ်လုပ်ငန်းများဖွံ့ဖြိုးတိုးတက်ရေး အတွက် ရည်ရွယ်ပြီးကျင်းပပြုလုပ်တာဖြစ်တယ်လို့လည်းသိရပါတယ်။ယနေ့ ဖွင့်ပွဲအခမ်းအနားသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ မြန်မာ့ကုန်သွယ်မှု မြှင့်တင်ရေးအဖွဲ့ ညွှန်ကြားရေး ဒေါက်တာထိန်လင်း၊ မြန်မာနိုင်ငံဆိုင်ရာ တရုတ်သံရုံးမှ စီးပွားရေးသံမှူး Mr. Ouyang Daobing ၊ မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်း (UMFCCI) မှ ဒုတိယ ဥက္ကဋ္ဌ ဦးအေးထွန်း ၊ China Chamber of Commerce for Import and Export of Textiles (CCCT)၏ ဦးဆောင် ဒါရိုက်တာ Mr.Yu Zu ၊ မြန်မာနိုင်ငံ အထည်ချုပ်လုပ်ငန်းရှင်များအသင်း (MGMA) ဥက္ကဋ္ဌ ဦးမြင့်စိုး၊ မြန်မာ- တရုတ် အထည်ချုပ်လုပ်ငန်းရှင်များ အသင်း (CTGA) ဥက္ကဋ္ဌ ဦးစံခွန်းနဲ့ မြန်မာ-တရုတ် နှစ်နိုင်ငံမှ အထည်ချုပ်၊ အထည်အလိပ် လုပ်ငန်းရှင်များစွာ တက်ရောက်ခဲ့ပါတယ်။
အခမ်းအနားမှာ မြန်မာ့ကုန်သွယ်မှု မြှင့်တင်ရေးအဖွဲ့ ညွှန်ကြားရေး ဒေါက်တာထိန်လင်းမှ “ ဒီကုန်စည်ပြပွဲဟာ တရုတ်-မြန်မာ နှစ်နိုင်ငံ အထည်အလိပ်နှင့်အထည်ချုပ်လုပ်ငန်းများ ပိုမိုဖွံ့ဖြိုးတိုးတက်စေဖို့အတွက် အလားအလာကောင်းများ ရှိနေတာဖြစ်ပါတယ်။ ဒီလုပ်ငန်းဟာ မြန်မာနိုင်ငံရဲ့ လူဦးရေ ၅ သိန်းနီးပါးကို အလုပ်အကိုင်အခွင့်အလန်းများစွာပေးထားသလို ပို့ကုန်ဝင်ငွေအများဆုံးရှာပေးနေတဲ့ ကဏ္ဍတစ်ခုလည်း ဖြစ်ပါတယ်။ ဒီအတွက် ဖောက်သည်အသစ်တွေရှာဖွေဖို့၊ နည်းပညာအသစ်တွေရှာဖွေဖို့ စက်ပစ္စည်းများ ရရှိဖို့တို့အတွက် ကုန်စည်ပြပွဲတွေဟာ မရှိမဖြစ်ဆိုသလို လိုအပ်ပါတယ်။ ပလက်ဖောင်းတစ်ခုလည်း ဖြစ်နေပါတယ်။ နှစ်နိုင်ငံ စီးပွားရေးလုပ်ငန်းရှင်များ အချင်းချင်းလည်း ချိတ်ဆက်မှုတွေရရှိနိုင်မှာဖြစ်ပါတယ်။ ဒီကုန်စည်ပြပွဲကနေ ရလဒ်ကောင်းတွေရရှိမယ်လို့လည်း ယုံကြည်ပါတယ်” လို့ ပြောကြားခဲ့ပါတယ်။
ဆက်လက်ပြီး မြန်မာနိုင်ငံဆိုင်ရာတရုတ်သံရုံးမှ စီးပွားရေးသံမှူး Mr. Ouyang Daobing မှ “ အထည်အလိပ်နှင့် အထည်ချုပ်လုပ်ငန်းဟာ တရုတ်-မြန်မာ စီးပွားရေးနဲ့ကုန်သွယ်ရေး ပူးပေါင်းဆောင်ရွက်မှုရဲ့ အရေးပါတဲ့ နယ်ပယ်တစ်ခုဖြစ်ပါတယ်။ လာမယ့် ၂၀၂၆ ခုနှစ်မှာ တရုတ်နိုင်ငံရဲ့ (၁၅)ကြိမ်မြောက် ၅ နှစ်စီမံကိန်းကို စတင်မှာဖြစ်ပြီး ၎င်းအစီအစဉ်မှာ အထည်အလိပ်လုပ်ငန်းများ၏ ဖွံ့ဖြိုးတိုးတက်ရေး ဦးတည်ချက်ကို ရှင်းရှင်းလင်းလင်းသတ်မှတ်ထားပြီး ယှဉ်ပြိုင်နိုင်စွမ်းရှိသော ခေတ်မီစက်မှုလုပ်ငန်း စနစ်တည်ဆောက်ရန် ကတိပြုထားပါတယ်။ ဒီလို မဟာဗျူဟာမြောက် ဖြန့်ကျက်မှုဟာ တရုတ်နှင့်မြန်မာ အထည်အလိပ် ပူးပေါင်းဆောင်ရွက်မှုအတွက် မကြုံစဖူး အခွင့်အလမ်းများကို ဖွင့်လှစ်ပေးတာဖြစ်ပါတယ်။ ဒီလို ကုန်စည်ပြတွေကနေ မြန်မာနိုင်ငံ၏ အထည်အလိပ်ကဏ္ဍဟာ အခိုင်အမာဆုံး နိုင်ငံတကာ ပလက်ဖောင်းတစ်ခု အနေဖြင့် ကမ္ဘာလုံးဆိုင်ရာအထည်အလိပ်နှင့် အထည်ချုပ်လုပ်ငန်း ထိပ်တန်းပုဂ္ဂိုလ်များကို စုစည်းပေးပြီး လုပ်ငန်းဖွံ့ဖြိုးတိုးတက်ဖို့ အရှိန်အဟုန်သစ်များ ထည့်သွင်းပေးသွားမှာ သေချာပါတယ် “ လို့ ပြောကြားခဲ့ပါတယ်။
ပြပွဲမှာတရုတ်နိုင်ငံမှကုမ္ပဏီပေါင်း ၇၀ ကျော်မှ ပြခန်းပေါင်း ၁၁၀ ကျော်နှင့်မြန်မာနိုင်ငံမှ ပြခန်းပေါင်း ၄၀ ခန့်၊ စုစုပေါင်းပြခန်း ၁၅၀ ကျော် ပါဝင်ပြီး မြန်မာနိုင်ငံ အထည်ချုပ်လုပ်ငန်းရှင်များအသင်းဝင် စက်ရုံများ၊ ကိုရီးယား(KOGAM) ၊ ဟောင်ကောင်(HKMMA) နှင့်အာဆီယံတို့မှ အထည်အလိပ်နှင့် စက်ယန္တရားများကို ပြသခဲ့ကြောင်းသိရပါတယ်။ပြပွဲဟာမြန်မာနိုင်ငံမှာ ရင်းနှီးမြှုပ်နှံလုပ်ကိုင်နေကြတဲ့ အပြည်ပြည်ဆိုင်ရာက အထည်ချုပ်လုပ်ငန်းတွေနဲ့ စက်ယန္တရားတွေကိုပါ ကြည့်ရှုနိုင်မယ့် အပြည်ပြည်ဆိုင်ရာ အထည်အလိပ်ပြပွဲကြီးဖြစ်ပြီး မြန်မာနိုင်ငံအထည်ချုပ် ကဏ္ဍအတွက် ရင်းနှီးမြှုပ်နှံမှုဈေးကွက်အသစ်များဖော်ဆောင်လာနိုင်ဖို့နဲ့ ဖွံ့ဖြိုးတိုးတက်လာဖို့အတွက် ရည်ရွယ်ကာ အခြားနိုင်ငံတကာအမှတ်တံဆိပ်များအဖြစ် Made in Myanmar နိုင်ငံတကာထုတ်ကုန် အဝတ်အထည်များကိုလည်းပြသခဲ့ကြပြီးပြည်တွင်း SME လုပ်ငန်းများအားအရောင်းမြှင့်တင်ခြင်းများ ၊ မိတ်ဆက်ခြင်းတွေပြုလုပ်နတာဖြစ်ပါတယ်။ဒီပြပွဲကြီးနဲ့အတူ လျှပ်စစ်ထုတ်ကုန်အမျိုးမျိုးနဲ့ကားပြပွဲ နဲ့ထိုင်းကုန်စည်ပြပွဲကိုလည်း ဒီဇင်ဘာလ ၅ ရက်ကနေ ၇ ရက်နေ့အထိ နေ့စဉ်နံနက် ၉ နာရီကန ညနေ ၅ နာရီအထိ ၃ ရက်တိုင် ကျင်းပပြုလုပ်သွားမှာဖြစ်ပါတယ်။
