မြန်မာ – တရုတ် နှစ်နိုင်ငံအကြား ကုန်သွယ်မှုနှင့် ရင်းနှီးမြှုပ်နှံမှု တိုးမြှင့်ရေးဆွေးနွေးခဲ့ကြတယ်လို့ နိုင်ငံခြား ရေး ဝန်ကြီးဌာနရဲ့ ထုတ်ပြန်ချက်အရ သိရပါတယ်။နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး ဦးတင်မောင်ဆွေဟာ တရုတ်ပြည်သူ့သမ္မတနိုင်ငံ၊ ကွန်မြူနစ် ပါတီ ဗဟိုကော်မတီရဲ့ နိုင်ငံရေး ဗျူရိုအဖွဲ့ဝင်၊ နိုင်ငံခြားရေးဝန်ကြီး မစ္စတာ ဝမ်ယိ နဲ့ ဇွန် ၅ ရက်က ပေကျင်း မြို့ရှိ ကျောက်ယွီထိုင် နိုင်ငံတော် ဧည့်ဂေဟာမှာ သွားရောက်တွေ့ဆုံစဉ် အခုလို ဆွေးနွေးခဲ့ကြတာပါ။
နှစ်ဖက်တွေ့ဆုံမှုမှာ မြန်မာ-တရုတ် နှစ်နိုင်ငံအကြား ရှိရင်းစွဲ ဆွေမျိုးပေါက်ဖော် ချစ်ကြည် ရင်းနှီးမှု ပိုမို ခိုင်မာစေရေး ၊ “ အေးအတူပူအမျှ အသိုက်အဝန်း” တည်ထောင်မှုအပါအဝင် လက်တွေ့ကျတဲ့ ပူးပေါင်း ဆောင်ရွက်မှုတွေ အရှိန်အဟုန်မြှင့်တင်ရေး၊ နှစ်နိုင်ငံနိုင်ငံခြားရေး ဝန်ကြီးဌာနတွေ အကြား ပူးပေါင်း ဆောင် ရွက်မှုတိုးမြှင့်ရေး၊ နှစ်နိုင်ငံ နယ်စပ်ဒေသ တည်ငြိမ်အေးချမ်းမှုအတွက် ဆက်လက်ပူးပေါင်း ဆောင် ရွက် သွားရေးနဲ့ မြန်မာ့ ငြိမ်းချမ်းရေးနဲ့ လူမှုစီးပွား ဖွံ့ဖြိုးတိုးတက်ရေး ကြိုးပမ်းမှုတွေမှာ တရုတ်နိုင်ငံက ဆက်လက် ပံ့ပိုးကူညီသွားရေးကိစ္စရပ်တွေကို အမြင်ချင်းဖလှယ် ဆွေးနွေးခဲ့ကြတယ်လို့ သိရပါတယ်။အဲဒီအပြင် နယ်စပ်ဒေသတွေရှိ အွန်လိုင်းလိမ်လည်မှုတွေနဲ့ တရားမဝင် လုပ်ငန်းတွေကို အိမ်နီး ချင်းကောင်း ပီသစွာ အတူတကွ ပူးပေါင်းတိုက်ဖျက်သွားရေးနဲ့ ဒေသတွင်း နဲ့ နိုင်ငံတကာ မျက်နှာစာ တွေမှာလည်း နှစ်နိုင်ငံ အပြန်အလှန်ထောက်ခံရပ်တည်ပြီး အကျိုးတူပူးပေါင်း ဆောင်ရွက်မှုတွေ တိုးမြှင့်ဆောင်ရွက်သွားဖို့ သဘော တူညီခဲ့ကြတယ်လို့ ဆိုပါတယ်။
ဆွေးနွေးပွဲမှာ ပြည်ထောင်စုဝန်ကြီး ဦးတင်မောင်ဆွေက တရုတ်နိုင်ငံအနေနဲ့ မြန်မာနိုင်ငံအပေါ် အစဉ်တစိုက် ထောက်ခံအားပေးမှုနဲ့ ကူညီပံ့ပိုးပေးမှုတွေ ၊ အထူးသဖြင့် မြေငလျင်အပြီး ပြန်လည်ထူထောင်ရေး လုပ် ငန်းတွေမှာ ကူညီပေးခဲ့တဲ့အတွက် ကျေးဇူးတင်ရှိကြောင်း ပြောကြားပါတယ်။မြန်မာနိုင်ငံအနေနဲ့ “တရုတ်တစ်နိုင်ငံတည်းမူဝါဒ” နဲ့ တရုတ်နိုင်ငံ အကြီးအကဲရဲ့ကမ္ဘာလုံး ဆိုင်ရာ အစီအမံ (၄) ရပ်အပေါ် အပြည့်အဝ ထောက်ခံပြီး ဒေသတွင်း နဲ့ နိုင်ငံတကာ မျက်နှာစာတွေမှာလည်း ဆက်လက် ပူးပေါင်း ဆောင်ရွက်သွားမယ်လို့ ဆိုပါတယ်။အထူးသဖြင့် SCO နဲ့ လန်ချန်း- မဲခေါင် ပူးပေါင်းဆောင်ရွက်မှု စတဲ့ မူဘောင်တွေအောက်ရှိ ပူးပေါင်း ဆောင်ရွက်မှုတွေကို ပိုမိုတိုးမြှင့် ဆောင်ရွက်သွားမှာ ဖြစ်တယ်လို့ ပြည်ထောင်စုဝန်ကြီး ဦးတင်မောင်ဆွေက ပြော ကြားခဲ့ပါတယ်။
တရုတ်နိုင်ငံခြားရေးဝန်ကြီး မစ္စတာ ဝမ်ယိကလည်း တရုတ်နိုင်ငံအနေနဲ့ ဆွေမျိုးပေါက်ဖော် ချစ်ကြည်ရင်းနှီးမှု ပိုမိုမြှင့်တင်ဆောင်ရွက်ရေး၊ မြန်မာနိုင်ငံရဲ့ ငြိမ်းချမ်းရေးလုပ်ငန်းစဉ်နဲ့ ဒီမိုကရေစီတည်ဆောက်မှုမှာ မြန်မာ နိုင်ငံရဲ့ အမျိုးသားအကျိုးစီးပွား နဲ့ ကိုက်ညီမှု ရှိတဲ့ လမ်းကြောင်းနဲ့ လျှောက်လှမ်းနေမှုကို ထောက်ခံ အား ပေးကြောင်း၊ နှစ်နိုင်ငံ နိုင်ငံခြားရေး ဝန်ကြီးဌာနတွေ အကြား ပိုမိုနီးကပ်စွာ ပူးပေါင်းဆောင်ရွက်ပြီး အပြန် အလှန်နား လည်မှု နဲ့ ယုံကြည်မှုကို မြှင့်တင်ကာ ကဏ္ဍစုံမှာ အကျိုးတူ ပူးပေါင်းဆောင်ရွက်မှုတွေ တိုးမြှင့် ဖော် ဆောင်သွားမယ်လို့ ထည့်သွင်းဆွေးနွေးခဲ့တယ်လို့ သိရပါတယ်။
