ပြည်ပကို ပို့ကုန်တွေတင်ပို့ခဲ့ပြီး ပို့ကုန်ရငွေတွေပြန်လည်ပေးသွင်းမှုမရှိတဲ့ လုပ်ငန်းရှင်၈ဦးကို အမှုဖွင့်အရေးယူထားတယ်လို့ အမျိုးသားကာကွယ်ရေးနှင့် လုံခြုံရေးကောင်စီ သတင်းထုတ်ပြန်ရေးအဖွဲ့က ထုတ်ပြန်ပါတယ်။ဖြစ်စဉ်ကတော့ ကမ္ဘာအေးဘုရားလမ်းရှိ ပုလဲကွန်ဒိုမှာ ရုံးခန်းဖွင့်လှစ်ထားတဲ့ Maha Nadi Internationalကုမ္ပဏီလီမိတက်က ဒါရိုက်တာတွေဖြစ်တဲ့ ဦးရဲမင်းလွင်၊ ဒေါ်ကွန်သီ၊ ဒေါ်ဖြူဖြူဇင်၊ ဒေါ်မြင့်မြင့်လှိုင်နဲ့ ဒေါ်ခင်စန်းသီတို့ဟာ ၂၀၂၂ခုနှစ်ကနေ ၂၀၂၄ခုနှစ်အတွင်း ပြည်ပကို အမေရိကန်ဒေါ်လာ ၄၂သန်းကျော်တန်ဖိုးရှိ မတ်ပဲတွေတင်ပို့ခဲ့ပြီး နိုင်ငံတော်ကို ပို့ကုန်ရငွေ အမေရိကန်ဒေါ်လာ သန်း၄၀ကျော် ပြန်လည်ပေးသွင်းဖို့ကျန်နေတယ်လို့ သိရပါတယ်။
အလားတူ ဦးဟင်နရီခင်မောင်နဲ့ ဒေါ်ဖြူဖြူဇင်တို့၂ဦးနာမည်နဲ့ တည်ထောင်ထားတဲ့ RK Shipping and Tradingကုမ္ပဏီလီမိတက်အနေနဲ့လည်း ၂၀၂၂ခုနှစ်ကနေ ၂၀၂၄ခုနှစ်အတွင်း ပြည်ပကို အမေရိကန်ဒေါ်လာ ၅ဒသမ၅သန်းကျော်တန်ဖိုးရှိ မတ်ပဲတွေတင်ပို့ခဲ့ပြီး အမေရိကန်ဒေါ်လာ ၂သန်းကျော်မှာ နိုင်ငံတော်ကို ပြန်လည်ပေးသွင်းမှုမရှိတာကို တွေ့ရတယ်လို့ ဆိုပါတယ်။ထပ်မံစစ်ဆေးတွေ့ရှိချက်တွေအရ ဦးဟင်နရီခင်မောင်ဟာ သားဖြစ်သူ ဦးရဲမင်းလွင်နဲ့ ခင်မင်ရင်းနှီးတဲ့ ဦးဗိုဗိုသန့်ရဲ့ Taw Thar Gyiကုမ္ပဏီလီမိတက်အမည်ခံပြီး ၂၀၂၄ခုနှစ်အတွင်း ပြည်ပကိုအမေရိကန်ဒေါ်လာ ၁၀သန်းကျော်တန်ဖိုးရှိ မတ်ပဲနဲ့ ပဲစဉ်းငုံတွေ တင်ပို့ခဲ့ပြီး ပို့ကုန်ရငွေ အမေရိကန်ဒေါ်လာ ၉ဒသမ၃သန်းကျော်မှာ နိုင်ငံတော်ကို ပြန်လည်ပေးသွင်းဖို့ကျန်နေတယ်လို့ ထုတ်ပြန်ချက်မှာ ဖော်ပြထားပါတယ်။
အလားတူ ဦးရဲမင်းလွင်ဟာ Ocean Lion Kingကုမ္ပဏီလီမိတက်အမည်ကို အသုံးပြုပြီး ပဲမျိုးစုံတင်ပို့နေတယ်လို့ သတင်းရတဲ့အတွက် ထပ်မံစိစစ်ခဲ့ရာ ၂၀၂၂ခုနှစ်မှ ၂၀၂၄ခုနှစ်အတွင်း ပြည်ပကို အမေရိကန်ဒေါ်လာ ၁ဒသမ၆သန်းကျော်တန်ဖိုးရှိ မတ်ပဲတွေကို တင်ပို့ခဲ့ပြီး နိုင်ငံတော်ကို ပို့ကုန်ရငွေတွေ ပြန်လည်ပေးသွင်းဖို့ ကျန်နေသေးတယ်လို့ သိရပါတယ်။ဒါ့အပြင်ဦးရဲမင်းလွင်ဟာ နိုင်ငံတော်ကို ပို့ကုန်ရငွေ ပြန်လည်ပေးသွင်းမှုမရှိတဲ့အတွက် သူ့ရဲ့ကုမ္ပဏီတွေ ပို့ကုန်/သွင်းကုန် လိုင်စင်ပိတ်သိမ်းခံရမှုအပေါ် ကျေနပ်မှုမရှိတာကြောင့် Viber Groupကနေ မြန်မာနိုင်ငံပဲမျိုးစုံ၊ ပြောင်းနှင့် နှမ်းကုန်သည်များအသင်းက တာဝန်ရှိသူတွေကို ကြမ်းတမ်းစွာဆဲဆိုတာ၊ အသက်အန္တရာယ်ခြိမ်းခြောက်တဲ့စာတွေ ရေးသားဖော်ပြတာတွေ လုပ်ဆောင်ခဲ့တယ်လို့ ဆိုပါတယ်။အဲဒါကြောင့် ပို့ကုန်ရငွေပြန်လည်ဝင်ရောက်မှုမရှိတဲ့ကုမ္ပဏီတွေက တာဝန်ရှိသူတွေဖြစ်တဲ့ ဦးရဲမင်းလွင်၊ ဒေါ်ကွန်သီ၊ ဒေါ်ဖြူဖြူဇင်၊ ဒေါ်မြင့်မြင့်လှိုင်၊ ဒေါ်ခင်စန်းသီ၊ ဦးဟင်နရီခင်မောင်၊ ဦးဗိုဗိုသန့်နဲ့ ဦးဌေးကိုတို့ ၈ဦးကို ပြစ်မှုတွေအလိုက် ထိရောက်စွာအရေးသွားမှာဖြစ်တယ်လို့ ဖော်ပြထားပါတယ်။အဲဒီ၈ဦးထဲက ဦးရဲမင်းလွင်၊ ဒေါ်ကွန်သီ၊ ဒေါ်ဖြူဖြူဇင်နဲ့ ဦးဌေးကိုတို့ဟာ ထွက်ပြေးတိမ်းရှောင်နေတယ်လို့လည်း ထုတ်ပြန်ချက်အရ သိရပါတယ်။နိုင်ငံတော်ရဲ့စီးပွားရေးနဲ့ ငွေကြေးမူဝါဒတွေ တည်ငြိမ်စေရေးအတွက် ပို့ကုန်ရငွေ ပြန်လည်ပေးသွင်းဖို့ကျန်နေတဲ့ တခြားကုမ္ပဏီတွေကိုလည်း ဆက်လက်ဖော်ထုတ်အရေးယူဆောင်ရွက်သွားမယ်လို့ ထုတ်ပြန်ထားပါတယ်။
