ထိုင်နိုင်ငံ ခရီးသွားလာရေးနှင့် အားကစားဝန်ကြီးဌာနက နိုင်ငံတစ်ဝန်း ခရီးသွားလုပ်ငန်း မြှင့်တင်ဖို့အတွက် နိုင်ငံ ခြားက ရောက်ရှိလာသူ ၂၀၀,၀၀၀ အတွက် ပြည်တွင်းလေယာဉ်လက်မှတ်တွေ အခမဲ့ ပေးနိုင်ဖို့ စီစဉ်နေတယ်လို့ သိရပါတယ်။ ဝန်ကြီးဌာနက အခု အစီအစဉ်အတွက် ဘတ်သန်း ၇၀၀ သုံးစွဲပြီး ဒီအစီအစဉ်ကနေ ဘတ် ၈ ဒသမ ၈ ဘီလီယံ ဝင်ငွေရရှိနိုင်မယ်လို့ မျှော်မှန်းထားတာပါ။ အစီအစဉ် စတင်နိုင်ဖို့ကတော့ အစိုးရအဖွဲ့ရဲ့ ခွင့်ပြုချက် လိုအပ်မှာ ဖြစ်ပါတယ်။
ခရီးသွားလာရေးနှင့် အားကစားဝန်ကြီး Sorawong Thienthong က အခုအစီအစဉ်ကို “နိုင်ငံတကာ လက်မှတ် ဝယ်၊ ထိုင်းပြည်တွင်း လေယာဉ်လက်မှတ် အခမဲ့ရယူ”လို့ အမည်ပေးထားပြီး နိုင်ငံခြားသား ဧည့်သည်တွေအနေနဲ့ ထိုင်းနိုင်ငံအလည်အပတ်ခရီးစဉ်ရဲ့ ဒုတိယမြောက်မြို့တွေကို အလည်သွားဖြစ်အောင် တွန်းအားတစ်ခု ဖြစ်စေဖို့ ရည်ရွယ်တယ်လို့ ပြောကြားခဲ့ပါတယ်။အခုနှစ်အစောပိုင်းမှာ ဂျပန်နိုင်ငံဟာလည်း အလားတူဗျူဟာကို အသုံးပြုပြီး ခရီးသွားတွေကို ဆွဲဆောင်ဖို့ ပြည်တွင်းလေယာဉ် လက်မှတ်တွေ အခမဲ့ စီစဉ်ပေးခဲ့တယ်လို့ သိရပါတယ်။
ဝန်ကြီးရဲ့ ပြောကြားချက်အရ နိုင်ငံတကာလေယာဉ်လက်မှတ် ကိုင်ဆောင်ထားတဲ့ နိုင်ငံခြားသားတွေဟာ ထိုင်း လေကြောင်းလိုင်းခြောက်ခုဖြစ်တဲ့ Thai Airways, Thai AirAsia, Bangkok Airways, Nok Air, Thai Lion Air နဲ့ Thai Vietjet တို့မှာ အလေးချိန် ၂၀ ကီလို သယ်ဆောင်ခွင့်ရှိတဲ့ အခမဲ့ ပြည်တွင်း အသွား-အပြန် လေယာဉ် လက်မှတ်တစ်စောင် အခမဲ့ ရယူနိုင်မှာ ဖြစ်ပါတယ်။“အခုအစီအစဉ်ဟာ လက်မှတ်မဝယ်ရသေးတဲ့ နိုင်ငံခြား ဧည့်သည်တွေအတွက် သီးသန့်လှုပ်ရှားမှုပါ” လို့လည်း ဝန်ကြီးက ဆိုပါတယ်။ အခုအစီအစဉ်ကို စက်တင်ဘာလကနေ နိုဝင်ဘာလအထိ အကောင်အထည်ဖော်ဖို့ စီစဉ်ထားပြီး အစိုးရက ခရီးသွားတစ်ယောက်ကို တစ်ကြောင်းအတွက် ဘတ် ၁,၇၅၀ ဒါမှမဟုတ် အသွား-အပြန်လက်မှတ်အတွက် ဘတ် ၃,၅၀၀ ထောက်ပံ့ပေးသွားမှာ ဖြစ်ပါတယ်။
