နိုင်ငံကူးလက်မှတ်အတုဖြင့် တရားမဝင် အလုပ်သမားပို့ဆောင်သူ ၈ ဦး ဖမ်းမိ

မြန်မာနိုင်ငံကူးလက်မှတ် (အတု)တွေနဲ့ ထိုင်းနိုင်ငံ နဲ့ မလေးရှားနိုင်ငံတွေကို တရားမဝင် အလုပ်သမားပို့ဆောင်သူ ရှစ်ယောက်ကို ဖမ်းဆီးရမိတယ်လို့ နစက သတင်းထုတ်ပြန်ရေးအဖွဲ့က ဇန်နဝါရီ ၆ ရက်မှာ ထုတ်ပြန်ပါတယ်။ပြီးခဲ့တဲ့ ဒီဇင်ဘာ ၉ ရက်က မြဝတီမြို့မှ ထိုင်းနိုင်ငံ၊ မဲဆောက်မြို့ကို ယာယီနယ်စပ်ဖြတ်သန်းခွင့်လက်မှတ်နဲ့ ထွက် ခွာမယ့် တောင်တွင်းကြီးမြို့နယ်နေ မနှင်းအိဖြူပါ အမျိုးသမီးငယ် သုံးယောက်အပါအဝင် မြန်မာလူငယ် ၁၁ ယောက်ထံမှ မြန်မာနိုင်ငံကူးလက်မှတ်အတု ၁၁ အုပ်ကို တွေ့ရှိသိမ်းဆည်းရမိခဲ့တယ်လို့ ဆိုပါတယ်။

စိစစ်မေးမြန်းချက်တွေအရ မနှင်းအိဖြူပါ ၉ ယောက်ကို ရန်ကုန်တိုင်းဒေသကြီး၊ ကျောက်တံတားမြို့နယ်၊ ၃၇ လမ်း(အထက်)ရှိ One Asia အလုပ်အကိုင်ရှာဖွေရေးအေဂျင်စီမှ မန်နေဂျင်းဒါရိုက်တာ နွယ်နီလှိုင်မင်း၊ ဒါရိုက်တာ ခင်မောင်ရွှေ (ခေါ်)ဗလတို့က တစ်ယောက်ကို ဝန်ဆောင်ခ ကျပ်သိန်း ၈၀ စီ ရယူပြီး လည်းကောင်း၊ ကျန်တဲ့ မောင် ကျော်မင်းထွန်းပါ ၂ ယောက်ကို ကျောက်တံတားမြို့နယ်၊ အနော်ရထာလမ်း နဲ့ ၃၉ လမ်းထောင့်၊ Central Tower ရှိ လျမ်းထက်ခရီးသွားဝန်ဆောင်မှုလုပ်ငန်းမှ မန်နေဂျင်းဒါရိုက်တာ စုမြတ် (ခေါ်) စုမြတ်နန္ဒာဝင်းက တစ်ယောက်ကို ကျပ်သိန်း ၇၀ စီ ယူပြီး လည်းကောင်း မြန်မာနိုင်ငံကူးလက်မှတ်အတုတွေ ပြုလုပ်ပေးကာ ထိုင်းနိုင်ငံကတစ်ဆင့် မလေးရှားနိုင်ငံကို တရားမဝင် လမ်းကြောင်းတွေကနေ ပို့ဆောင်ဖို့ စီစဉ်ဆောင်ရွက်ခဲ့တာဖြစ်တယ်လို့ ထုတ်ပြန် ချက်အရ သိရပါတယ်။

အဲဒါကြောင့် ပြစ်မှုကျူးလွန်သူတွေ ဖြစ်တဲ့ One Asia အလုပ်အကိုင်ရှာဖွေရေးအေဂျင်စီမှ နွယ်နီလှိုင်မင်း၊ ခင်မောင်ရွှေ (ခေါ်)ဗလ၊ လျမ်းထက်ခရီးသွားဝန်ဆောင်မှုလုပ်ငန်းမှ ဝဏ္ဏဇော် (ခေါ်) ကိုပေါက်၊ နိုင်ငံကူးလက်မှတ် အတုပြုလုပ်သူတွေဖြစ်တဲ့ ကမာရွတ်မြို့နယ်၊ အမှတ် ၃ ရပ်ကွက်နေ ညိုမင်း၊ လှိုင်မြို့နယ်၊ အမှတ် ၁၆ ရပ်ကွက်နေ ဂျွန်ကိုကို (ခေါ်) ဂျွန်ကို နဲ့ သူရဲ့ ဖခင်ဖြစ်သူ ထွန်းရီ၊ အလုပ်သမားတွေကို တရားမဝင် ပို့ဆောင်ပေးသူတွေ ဖြစ်တဲ့ ပန်းဘဲ တန်းမြို့နယ်၊ အမှတ် ၈ ရပ်ကွက်နေ စန်းဝင်း (ခေါ်) ရဖီး နဲ့ မြောက်ဒဂုံမြို့နယ်၊ အမှတ် ၄ ရပ်ကွက်နေ သန့်ဇင်ဦး တို့ ၈ ယောက်ကို ဖမ်းဆီးရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ဖမ်းမိသူတွေရဲ့ ထွက်ဆိုချက်တွေအရ မြန်မာနိုင်ငံကူးလက်မှတ်အတုတွေ ပြုလုပ်ကာ အလုပ်သမားတွေကို ရန်ကုန် မြို့ကို ခေါ်ယူစုစည်းပြီး ရန်ကုန်မြို့မှ ခရီးသည်တင်ယာဉ်နဲ့ မြဝတီမြို့ကို ပို့ဆောင်ပေးကြောင်း၊ မြဝတီမြို့ကို ရောက် ရှိပါက အမှတ် (၁) မြန်မာ-ထိုင်း ချစ်ကြည်ရေးတံတားမှ ယာယီနယ်စပ်ဖြတ်သန်းခွင့်လက်မှတ်နဲ့လည်း ကောင်း၊ တရားမဝင်လမ်းကြောင်းတွေက လည်းကောင်း ထိုင်းနိုင်ငံ၊ မဲဆောက်မြို့ကို ပို့ဆောင်ကြောင်း၊ မဲဆောက် မြို့ကို ရောက်ရှိပါကလည်း ထိုင်းနိုင်ငံမှာ အလုပ်လုပ်ကိုင်ခွင့်လက်မှတ် (ဘတ်ကတ်)အတုတွေ ထုတ်ပေးကာ မဲ ဆောက်မြို့မှ ဘန်ကောက်မြို့ကို မော်တော်ယာဉ်နဲ့ ပို့ဆောင်ကြောင်း၊ ဘန်ကောက်မြို့ကို ရောက်ရှိတဲ့အခါ မြန်မာ နိုင်ငံကူးလက်မှတ်အတုနဲ့ လေယာဉ်လက်မှတ်ဝယ်ယူပြီး ထိုင်းနိုင်ငံတောင်ပိုင်းကို လေကြောင်းခရီးနဲ့ ပို့ဆောင်ပေး ကြောင်း၊ အဲဒီကနေတစ်ဆင့် မလေးရှားနိုင်ငံ နယ်စပ်ကို တရားမဝင် လမ်းကြောင်းတွေကနေ ပို့ဆောင်ခဲ့ကြောင်း စစ် ဆေးပေါ်ပေါက်တယ်လို့ ထုတ်ပြန်ချက်မှာ ပါရှိပါတယ်။

အမှုမှာ ဖမ်းမိသူတွေက အပ်နှံတဲ့ နိုင်ငံကူးလက်မှတ်အတု ၇၃၄ အုပ်ကို အတုပြုလုပ်ပေးခဲ့ကြောင်း နဲ့ ထွက်ပြေး တိမ်းရှောင်နေတဲ့ ကျန်ပြစ်မှုကျူးလွန်သူတွေကို ဖမ်းဆီးရမိရေး ဆက်လက်စစ်ဆေးဖော်ထုတ်နေတယ်လို့လည်း ထုတ်ပြန်ထားပါတယ်။