ဖလော်ရီဒါတွင် ရထားနှင့် မီးသတ်ကားတိုက်မိပြီး ၁၅ ဦး ဒဏ်ရာရ

အမေရိကန်ပြည်ထောင်စု၊ ‌ဖလော်ရီဒါပြည်နယ် ဒယ်လ်ရေး ကမ်းခြေဒေသမှာ ဒီဇင်ဘာ ၂၈ ရက်က မီးရထားတစ်စီးနဲ့ မီးသတ်ကားတို့ တိုက်မိပြီး ၁၅ ဦး ဒဏ်ရာရခဲ့တယ်လို့ CNN သတင်းအရသိရပါတယ်။

အော်လန်ဒိုနဲ့ မိုင်ယာမီအကြား ပြေးဆွဲနေတဲ့ Brightline ရထားလိုင်းက ရထားတစ်စီးနဲ့ မီးသတ်ယာဉ်တစ်စီးတို့ မတော်တဆ တိုက်မိတာပါ။

ဒီ့အတွက် မီးသတ်သမား ၃ ဦးနဲ့ ရထားပေါ်က ခရီးသည် ၁၂ ဦး ဒဏ်ရာရရှိခဲ့ပြီး လူအသေအပျောက်တော့ မရှိဘူးလို့ သိရပါတယ်။

မီးသတ်သမား ၃ ဦးကို အနီးအနားက ဆေးရုံဆီ ပို့ဆောင်ခဲ့ပြီး ရထားပေါ်က ဒဏ်ရာအနည်းငယ်ရရှိသူ ၁၂ ဦးကိုတော့ အရေးပေါ်ကယ်ဆယ်ရေးအဖွဲ့တွေက ကူညီပေးခဲ့ပါတယ်။

အခုလို မတော်တဆမှုဖြစ်ပွားရတဲ့ အကြောင်းရင်းကို ဒယ်လ်ရေး ကမ်းခြေ ရဲဌာန၊ ရထားလိုင်းတာဝန်ရှိသူတွေနဲ့ သက်ဆိုင်ရာ ဒေသအာဏာပိုင်တွေက စစ်ဆေးနေပါတယ်။