ပြီးခဲ့တဲ့ ဩဂုတ်လက ရန်ကုန် စတော့အိတ်ချိန်း Main Board မှာ Block Trading စနစ်နဲ့ အရောင်းအဝယ်ဖြစ်တဲ့ စတော့ရှယ်ယာ စောင်ရေ ၁ သိန်းခွဲ ကျော်ရှိခဲ့ပြီး စုစုပေါင်း အရောင်းအဝယ် ဖြစ်မြောက်တဲ့ ရှယ်ယာတန်ဖိုးငွေ ကျပ် ၄၃၄ သန်းကျော် ရှိခဲ့တယ်လို့ ရန်ကုန်စတော့အိတ်ချိန်းရဲ့ အချက်အလက်တွေအရ သိရပါတယ်။
သာမန်အရောင်းအဝယ်ပြုလုပ်တဲ့စနစ်မှာတော့ ရှယ်ယာစောင်ရေ ၁ သိန်း ၂ သောင်းကျော် အရောင်းအဝယ် ဖြစ် ခဲ့ပြီး ရှယ်ယာအရာင်းအဝယ် တန်ဖိုးအနေနဲ့ ကျပ် ၃၆၄ သန်း ကျော် ရှိခဲ့တာပါ။ဒါ့ကြောင့် ဩဂုတ်လထဲမှာ သာမန်အရောင်းအဝယ်ပြုလုပ်တဲ့စနစ် အပါအဝင် စတော့ အရေအတွက် အများအပြား အရောင်းအဝယ် ဖြစ်တဲ့ Block Trading စနစ်နဲ့ အရောင်းအဝယ် ဖြစ်မြောက်တဲ့ စတော့ရှယ်ယာ စောင်ရေ စုစု ပေါင်း ၂ သိန်း ၇ သောင်းကျော် ရှိခဲ့ပြီး တန်ဖိုးငွေ ကျပ် ၇၉၈ သန်းကျော် ရှိခဲ့ပါတယ်။ရန်ကုန် စတော့အိတ်ချိန်းဈေးကွက်ထဲမှာ စတော့ရှယ်ယာ ရင်းနှီးမြှုပ်နှံသူ တစ်ယောက် ဒါမှမဟုတ် အဖွဲ့အစည်း တစ်ခုက တစ်ကြိမ်တည်းမှာ ရှယ်ယာစောင်ရေ တစ်သောင်းနဲ့အထက် အရောင်းအဝယ်လုပ်ဆောင်တာကို Block Trading စနစ်နဲ့ အရောင်းအဝယ် ဖြစ်မြောက်တယ်လို့ သတ်မှတ်ထားတာ ဖြစ်ပါတယ်။
ဩဂုတ်လမှာ စတော့ရှယ်ယာ အရောင်းအဝယ်တန်ဖိုးက ဇူလိုင်လထက် ကျပ်သန်း ၁၉၀ နီးပါး ပိုခဲ့ပါတယ်။ ရန်ကုန်စတော့အိတ်ချိန်း Main Board အပြင် ဒုတိယဈေးကွက်ဖြစ်တဲ့ Pre Listing Board မှာလည်း စတော့ ရှယ်ယာစောင်ရေ ၂၄၀၀ ကျော် အရောင်းအဝယ်ဖြစ်ခဲ့ပြီး တန်ဖိုးအနေနဲ့ ကျပ် ၇ သန်းကျော်ရှိ ပါတယ်။လက်ရှိ ရန်ကုန်စတော့အိတ်ချိန်း Main Board မှာ အများပိုင်ကုမ္ပဏီ ၈ ခုနဲ့ နေ့စဉ် အစုရှယ်ယာ အရောင်းအဝယ် ဆောင်ရွက်နေပြီး Pre –Listing Board မှာတော့ လယ်ယာစိုက်ပျိုးရေးကို အခြေခံတဲ့ကုမ္ပဏီတစ်ခုနဲ့ အရောင်း အဝယ် ဆောင်ရွက်နေပါတယ်။
