နယူးကာဆယ်အသင်းကို ၂ ဂိုး- ၃ ဂိုးနဲ့ အနိုင်ရတဲ့ပွဲမှာ လီဗာပူးအသင်းအတွက် အနိုင်ဂိုးသွင်းပေးခဲ့တဲ့ လူငယ် တိုက်စစ်မှူး ရီယို နူမိုဟာကို လီဗာပူးအသင်းခေါင်းဆောင် ဗန်ဒိုက်ချ်က ချီးကျူးသွားပါတယ်။
လာမယ့် သောကြာ နေ့မှ အသက် ၁၇ နှစ်ပြည့်မယ့် နူမိုဟာ ဟာ နာကျင်အချိန်ပိုရောက်မှ လူစားလဲဝင်ရောက် ကစားခွင့်ရခဲ့ပေမယ့် ကွင်းထဲရောက်ပြီး ၄ မိနစ်အကြာမှာပဲ လီဗာပူးအတွက် အဖိုးတန်အနိုင်ဂိုးကို သွင်းယူပေးခဲ့တာဖြစ်ပါတယ်။ ဒီဂိုး သွင်းယူချိန်မှာ နူမိုဟာရဲ့ အသက်က ၁၆ နှစ်နဲ့ ၃၆၁ ရက်သာရှိသေးတဲ့အတွက် ပရီးမီးယားလိဂ်သမိုင်းမှာ ဂိုးသွင်း ယူနိုင်တဲ့ စတုတ္ထမြောက် အသက်အငယ်ဆုံး ကစားသမားလည်းဖြစ်လာပါတယ်။ လီဗာပူးအသင်းအတွက် ပထမဆုံးပရီးမီးယားလိဂ်ပွဲမှာပဲ ဂိုးသွင်းယူနိုင်တာက နူမိုဟာအတွက် အိပ်မက်ဆန်တဲ့ ပွဲဦးထွက်ဖြစ်မှာသေချာ ပါတယ်လို့ ဗန်ဒိုက်ချ်က ပြောသွားပါတယ်။
လီဗာပူးအသင်းဟာ ၂ ဂိုးအသာနဲ့ ဦးဆောင်ခဲ့ပေမယ့် နယူးကာဆယ် အသင်းက ချေပဂိုး ၂ဂိုးပြန်သွင်းခဲ့လို့ သရေကျမယ့် အခြေအနေနဲ့ ရင်ဆိုင်လိုက်ရတာပါ။ ဒါပေမဲ့လည်း နူမိုဟာရဲ့ သွင်းဂိုးကြောင့် အဝေးကွင်းမှာ အဖိုးတန် ၃ မှတ်ရခဲ့တာဖြစ်ပြီး နည်းပြစလော့ကလည်း အသက် ၁၆ နှစ်အရွယ် ကစားသမားလေးရဲ့ ပရီးမီးယားလိဂ် ပထမဆုံးသွင်းဂိုးက အရမ်းကို ခမ်းနားပါတယ်လို့ ပြောသွားပါတယ်။ ရာသီကြို ခြေစမ်းပွဲတွေမှာ ခြေစွမ်းပြခဲ့တဲ့ နူမိုဟာက ပရီးမီးယားလိဂ်မှာလည်း သွင်းဂိုးရခဲ့ပြီဖြစ်လို့ လာမယ့် ပွဲတွေမှာ ပွဲကစားချိန် ပိုရလာဖို့ ရှိနေပါတယ်။
