မတ်လ ၂၉ ရက်၊ မြန်မာစံတော်ချိန် မနက် ၅ နာရီ၊ ၅၁ မိနစ် အချိန်လောက်က အင်အားရစ်(ခ်)တာစကေး (၅.၀) အဆင့်ရှိ အင်အားအသင့်အတင့်ရှိတဲ့ မြေငလျင်တစ်ခု လှုပ်ရှားသွားတယ်လို့ မိုးလေဝသနှင့် ဇလဗေဒညွှန်ကြားမှု ဦးစီးဌာနက ထုတ်ပြန်ထားပါတယ်။
နေပြည်တော်မြေငလျင်စခန်းကနေ မြောက်-အရှေ့မြောက်ဘက်(၁၃) မိုင်ခန့်ကွာဝေးတဲ့ မြန်မာနိုင်ငံပြည်တွင်း (ပုဗ္ဗသီရီမြို့နယ်ရဲ့ မြောက်-အရှေ့မြောက်ဘက် (၅)မိုင်ခန့်အကွာ) မြောက်လတ္တီတွဒ်(၁၉ ဒသမ ၉၆) ဒီဂရီ၊ အရှေ့လောင်ဂျီတွဒ် (၉၆ ဒသမ ၂၁) ဒီဂရီ၊ အနက် (၁၀)ကီလိုမီတာကို ဗဟိုပြုပြီး လှုပ်ခတ်သွားတာဖြစ်တယ်လို့ ဆိုပါတယ်။
မတ်လ ၂၈ ရက်၊ မြန်မာစံတော်ချိန် နေ့လယ် (၁၂) နာရီ၊ (၅၁) မိနစ်အချိန်လောက်က အင်အားရစ်(ခ်)တာစကေး (၇ ဒသမ ၇) အဆင့်ရှိ အင်အားပြင်းထန်တဲ့ မြေငလျင် လှုပ်ခတ်ခဲ့တာဖြစ်ပြီး နောက်ဆက်တွဲ မြေငလျင်တွေလည်း ထပ်မံလှုပ်ခတ်ခဲ့သေးတယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက ထုတ်ပြန်ထားပါတယ်။
မတ်လ ၂၈ ရက်က လှုပ်ခတ်ခဲ့တဲ့ အင်အားအလွန်ပြင်းထန်တဲ့ မြေငလျင်ဒဏ်ကြောင့် နေပြည်တော်အပါအဝင် မန္တလေးနဲ့ အခြားဒေသအချို့မှာ ထိခိုက်ပျက်စီးဆုံးရှုံးမှုတွေ များပြားခဲ့ပြီး မန္တလေးတိုင်းဒေသကြီးအတွင်းမှာတော့ လက်ရှိအချိန်အထိ နောက်ဆုံးကောက်ယူရရှိတဲ့ စာရင်းတွေအရ ငလျင်ဒဏ်ကြောင့် သေဆုံးခဲ့ရသူ ၆၉၄ ယောက်၊ ဒဏ်ရာရရှိသူ ၁၆၇၀ နဲ့ ပျောက်ဆုံးနေသူ ၆၈ ယောက် ရှိပြီး အသေးစိတ်စာရင်းကို ဆက်လက်ကောက်ယူ နေတယ်လို့ သိရပါတယ်။
