မြေငလျင်ဒဏ်ကြောင့် ဓာတ်အားပေးစက်ရုံ၊ ခွဲရုံနဲ့ ဓာတ်အားလိုင်းတွေရဲ့ ဓာတ်လွှတ်ပစ္စည်းတွေ ချိုယွင်းပျက်စီးမှု ဖြစ်ပေါ်ခဲ့တဲ့အတွက် မတ်လ ၂၉ ရက်ကစပြီး ရန်ကုန်တိုင်းဒေသကြီးအတွင်း တစ်ရက်ကို အုပ်စု ၆ ခုနဲ့ ၄ နာရီသာ ရေတင်နိုင်ရေး ဓာတ်အားဖြန့်ဖြူးပေးနိုင်မှာ ဖြစ်တယ်လို့ ရန်ကုန်လျှပ်စစ်ဓာတ်အားပေးရေး ကော်ပိုရေးရှင်းက ထုတ်ပြန်ပါတယ်။
မတ်လ ၂၈ ရက်၊ မြန်မာစံတော်ချိန် နေ့လယ် ၁၂ နာရီ ၅၁ မိနစ်အချိန်လောက်က မြန်မာနိုင်ငံ ပြည်တွင်း မန္တလေးမြိုရဲ့ အရှေ့ မြောက်ဘက် ၂၀ ကီလိုမီတာခန့်အကွာ အနက်(၁၀)ကီလိုမီတာကို ဗဟိုပြုပြီး အင်အားရစ်(ခ်)တာစကေး ၇ ဒသမ ၇ အဆင့်ရှိ အင်အားအလွန်ပြင်းထန်တဲ့ မြေငလျင် လှုပ်ရှားသွားခဲ့တာ ဖြစ်ပါတယ်။
မြေငလျင်ဒဏ်ကြောင့် ဓာတ်အားစနစ်အတွင်းကို ဓာတ်အားထုတ်လုပ် ပို့လွှတ်နေတဲ့ ဓာတ်အားပေးစက်ရုံ၊ ခွဲရုံနဲ့ ဓာတ်အားလိုင်းတွေရဲ့ဓာတ်လွှတ်ပစ္စည်းတွေ ချိုယွင်းပျက်စီးမှု ဖြစ်ပေါ်ခဲ့တယ်လို့ ဆိုပါတယ်။
အဲဒါကြောင့် ဓာတ်အားစနစ်ကနေ ဓာတ်အားချိတ်ဆက်ပိုလွှတ်နိုင်တာ မရှိသေးတဲ့ကာလအတွင်း ရန်ကုန်တိုင်းဒေသကြီး အတွင်းရှိ Gas Turbine တွေက ဓာတ်အားထုတ်လုပ်ဖြန့်ဖြူးနိုင်ဖို့ ကြိုးပမ်းစီမံဆောင်ရွက်နေရာ မတ်လ၂၉ ရက်၊ မနက် ၅ နာရီ အချိန်ကစပြီး တစ်ရက်အတွင်း အုပ်စု(၆)ခုနဲ့ (၄)နာရီနှုန်းခန့်သာ ရေတင်နိုင်ဖို့အတွက် ဓာတ်အား ဖြန့်ဖြူးပေးနိုင်မှာ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
နိုင်ငံတော်ဓာတ်အားစနစ်ကနေ ဓာတ်အားပြန်လည်ချိတ်ဆက် ပို့လွှတ်ပေးနိုင်ရင် ပုံမှန်အတိုင်း ဓာတ်အား ပြန်လည် ဖြန့်ဖြူးပေးနိုင်မှာဖြစ်တယ်လို့လည်း မေတ္တာရပ်ခံ အသိပေးပန်ကြားထားပါတယ်။
