One ချန်ပီယံရှစ်ပြိုင်ပွဲ မစ်ဒယ်ဝိတ်တန်းစိန်ခေါ်ပွဲမှာ နာမည်ကြီး မြန်မာဖိုက်တာ အောင်လအန်ဆန်နဲ့ တူကီယဲနိုင်ငံသား ရှာမေးလ်အာဒိုဂန်တို့ ယှဉ်ပြိုင်ထိုးသတ်သွားမယ်လို့ ထုတ်ပြန်ထားပါတယ်။
စက်တင်ဘာ ၇ ရက်၊ မနက်အစောပိုင်းမှာ အမေရိကန်နိုင်ငံ ဒန်ဗာမြို့မှာကျင်းပမယ့် အဲဒီပြိုင်ပွဲမှာတော့ တွဲဆိုင်း စုစုပေါင်း ၁၂ ပွဲ ထည့်သွင်းကျင်းပသွားမယ်လို့ ဆိုပါတယ်။ အဲဒီပြိုင်ပွဲမှာတော့ စိန်ခေါ်ပွဲ ၁၀ ပွဲ၊ ချန်ပီယံခါးပတ်လုပွဲနှစ်ပွဲပါဝင်မှာဖြစ်ပြီး အဓိကတွဲဆိုင်းအနေနဲ့ ဘင်တန်ဝိတ်တန်းမွေထိုင်း ကမ္ဘာ့ချန်ပီယံလုပွဲမှာ ဗြိတိန်နိုင်ငံသားဂျိုနသန်နဲ့ ထိုင်းနိုင်ငံသားဆူပါလက်ခ်တို့ ယှဉ်ပြိုင်ထိုးသတ်မှာဖြစ်ပါတယ်။
အောင်လအန်ဆန်နဲ့ အာဒိုဂန်တို့ပွဲကိုတော့ ပွဲစဉ် ၉ အဖြစ် ကျင်းပမှာဖြစ်ပြီး အောင်လအန်ဆန်ဟာ MMA ပွဲတွေနဲ့ တစ်နှစ်ကျော်ဝေးကွာပြီးမှ ပြန်လည်ယှဉ်ပြိုင်ထိုးသတ်တာဖြစ်လို့ ရလဒ်ကောင်းရယူနိုင်ဖို့ လိုအပ်နေတယ်လို့သိရပါတယ်။
အာဒိုဂန်နဲ့ ထိုးသတ်မယ့်ပွဲမှာ အောင်လအန်ဆန်အတွက် ONE Championship အဖွဲ့အစည်းနဲ့ လက်တွဲအပြီး ပွဲ ၂၀ မြောက် ထိုးသတ်ခွင့်ရတဲ့ ပွဲစဉ်ဖြစ်တယ်လို့လည်းသိရပါတယ်။ အောင်လအန်ဆန်ဟာ နောက်ဆုံးပွဲအဖြစ် ပြီးခဲ့တဲ့ ၂၀၂၃ ခုနှစ် မေလအတွင်းက အမေရိကန်နိုင်ငံမှာ တရုတ်ဖိုက်တာ ဖန်ယုံနဲ့ထိုးသတ်ခဲ့ပြီး ဒုတိယအချီမှာ ချုပ်ကွက်နဲ့အနိုင်ရခဲ့ပါတယ်။
