ပရီးမီးယားလိဂ်ကလပ် ဖူဟမ်အသင်းဟာ ဗီလာရီးရဲလ်နောက်ခံလူ ကူရန်ကာကို ခေါ်ယူနိုင်ခဲ့ပြီဖြစ်ပြီး ဩဂုတ်လ (၄)ရက်နေ့မှာ ပရိသတ်တွေနဲ့ တရားဝင်မိတ်ဆက်ပေးသွားခဲ့ပါတယ်။
ဖူဟမ်အသင်းဟာ အခုဘောလုံးရာသီမှာ လူအင်အားဖြည့်တင်းမှုတွေ လုပ်နေခဲ့တာဖြစ်ပြီး စပိန်နောက်ခံလူ ကူရန်ကာကိုလည်း ခေါ်ယူဖို့လုပ်ဆောင်ခဲ့တာပါ။
ဖူဟမ်အသင်းကို ပြောင်းရွှေ့နိုင်ခဲ့တဲ့အတွက် ပျော်ရွှင်မိသလို အသင်းအတွက် ကစားရမယ့်အပေါ် ဂုဏ်ယူမိတယ်လို့ ကူရန်ကာက အသင်းနဲ့ပထမဆုံး အင်တာဗျူးမှာ ပြောသွားခဲ့ပါတယ်။
ပရီးမီးယားလိဂ်မှာ ကစားရဖို့က အိပ်မက်တစ်ခုဖြစ်ခဲ့တာကြောင့်လည်း ဖူဟမ်အသင်းကို ပြောင်းရွှေ့နိုင်ခဲ့တာက ခံစားချက်ကောင်းစေခဲ့တယ်လို့ ကူရန်ကာက ဆက်လက်ပြောကြားခဲ့ပါတယ်။
ဖူဟမ်အသင်းဟာ အသက်(၂၄)နှစ်အရွယ် ဘာစီလိုနာအကယ်ဒမီ ထွက် ကူရန်ကာကို (၂၀၂၈)ခုနှစ်အထိ သက်တမ်းရှိတဲ့ (၄)နှစ်စာချုပ် ချုပ်ဆိုခဲ့တာဖြစ်ပါတယ်။
