မန္တလေးမြို့ ချမ်းမြသာစည်မြို့နယ်မှာ အွန်လိုင်းလောင်းကစားတွေကြောင့် အကြွေးတင်ပြီး ငွေကြေး လိုအပ်နေတဲ့ အတွက် ဆရာဝန် တစ်ယောက်ကို ကျပ်သိန်း ၃၀၀၀ နဲ့ ပြန်ပေးဆွဲ သတ်ဖြတ်ခဲ့တဲ့ သူငယ်ချင်း ဆရာဝန် ဖြစ်သူ အပါအဝင် အမျိုးသား နှစ်ယောက်ကို ဖမ်းမိခဲ့တယ်လို့ နစက သတင်းထုတ်ပြန်ရေးအဖွဲ့ က ထုတ်ပြန်ပါတယ်။
အမှုဖြစ်စဉ်ကတော့ ချမ်းမြသာစည်မြို့နယ်၊ အောင်ပင်လယ်ရပ်ကွက်နေ ဦးအောင်ကျော်စိုးထံကို အမျိုး သားတစ်ယောက်က ဖုန်းဆက်သွယ်ပြီး သားဖြစ်သူ ဒေါက်တာ အောင်မြင့်မြတ်ထွန်းကို ပြန်ပေးဆွဲထား ကြောင်း အသက်မသေစေလိုရင် ကျပ်သိန်း ၃၀၀၀ နဲ့ မဟာမြတ်မုနိဘုရားကြီး တောင်ဘက်မုခ်မှာ လာထားဖို့ နဲ့ ငွေလက်ခံ ရရှိပြီးမှသာ သားဖြစ်သူကို ပြန်လွှတ်ပေးမှာ ဖြစ်တယ်လို့ ပြောဆိုခဲ့ပါတယ်။ဖခင်ဖြစ်သူ ဦးအောင်ကျော်စိုးဟာ ကျပ်သိန်း ၃၀၀၀ ကို ပြန်ပေးဆွဲထားသူ ခိုင်းတဲ့နေရာကို ပို့ဆောင် ခဲ့ပြီးနောက် ငွေလက်ခံရရှိကြောင်း ပြန်ဆက်သွယ်ပေမယ့် သားဖြစ်သူ ဒေါက်တာ အောင်မြင့်မြတ်ထွန်း မှာ နေအိမ်ကို ပြန်မရောက်လာတာကြောင့် ဒီဇင်ဘာ ၁၈ ရက်မှာ သက်ဆိုင်ရာ အောင်ပင်လယ် နယ်မြေ ရဲစခန်းမှာ သွားရောက် တိုင်တန်း အမှုဖွင့်ခဲ့တယ်လို့ ထုတ်ပြန်ချက်အရ သိရပါတယ်။
ပြစ်မှုကျူးလွန်သူတွေကို စုံစမ်းဖော်ထုတ်ခဲ့ရာ ဒီဇင်ဘာ ၁၉ ရက်၊ မနက် ၂ နာရီလောက်မှာ မသင်္ကာသူ ဒေါက်တာ အောင်ဇင်ဖြိုး ကို စစ်ဆေးခဲ့ရာ သူရဲ့ ထွက်ဆိုချက်အရ ဒေါက်တာ အောင်မြင့်မြတ်ထွန်း နဲ့ ဆေးကျောင်းအတူ တက်ရောက်ခဲ့တဲ့ သူငယ်ချင်းဖြစ်ကြောင်း၊ သူအနေနဲ့ အွန်လိုင်း ဘောလုံး၊ နှစ်လုံး၊ သုံး လုံးထီ လောင်းကစား တွေကြောင့် အကြွေးတင်ကာ ငွေကြေးလိုအပ်နေတဲ့အတွက် သူငယ်ချင်းဖြစ်သူကို ဖုန်းဆက်ခေါ်ခဲ့ကြောင်း၊ သူငယ်ချင်း ဖြစ်သူ ရောက်လာချိန်မှာ ဒေါက်တာ အောင်ဇင်ဖြိုးဟာ သူရဲ့ ဆေး ခန်းမှ အကူဖြစ်သူ လွမ်းဇင်အောင် (ခေါ်) မိုးဒီ နဲ့အတူ ချုပ်နှောင်နပန်းလုံးပြီး ပါးစပ်၊ လက် ၊ ခြေထောက် တို့ကိုချုပ်နှောင်ပြီး လည်ပင်းညှစ်ရာမှ သေဆုံးခဲ့တာ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
အဲဒီနောက် သေဆုံးသူ ဒေါက်တာ အောင်မြင့်မြတ်ထွန်းရဲ့ မိဘတွေထံ ဖုန်းနဲ့ အသံဖျက်ပြီး ပြန်ပေးဆွဲ ထားကြောင်း ကျပ်သိန်း ၃၀၀၀ လာရောက်ပို့ဆောင်ဖို့ ခြိမ်းခြောက်ပြောဆိုခဲ့ကြောင်း သေဆုံးသူရဲ့ မိဘတွေ လာရောက် ထားပေး ခဲ့တဲ့ ငွေတွေကို ဆိုင်ကယ် နှစ်စီး၊ မော်တော်ယာဉ်တစ်စီး ဝယ်ယူခဲ့ကြောင်း သေဆုံးသူ အလောင်းကိုတော့ ချမ်းမြ သာစည်လေယာဉ်ကွင်းဟောင်း နဲ့ ၇၈ လမ်းကြား လမ်းဘေးရှိ ရေ မြောင်းထဲကို ပစ်ချခဲ့ကြောင်း ဖော်ပြထားပါတယ်။ ပြစ်မှုကျူးလွန်ရာမှာ အတူပါဝင်သူ လွမ်းဇင်အောင် (ခေါ်) မိုးဒီ ကိုလည်း ဆက်လက်ဖမ်းဆီးနိူင်ခဲ့တယ်လို့ ထုတ်ပြန်ချက်မှာ ပါရှိပါတယ်။
ပြစ်မှုကျူးလွန်သူ နှစ်ယောက်ကို ဥပဒေနဲ့အညီ ထိရောက်တဲ့ ပြစ်ဒဏ်ရရှိရေး ဆက်လက် ဆောင်ရွက်နေပြီးမိဘပြည်သူတွေအနေနဲ့လည်း အွန်လိုင်းလောင်းကစားတွေ မပြုလုပ်ကြဖို့ နဲ့ အွန်လိုင်းလောင်း ကစား ပြုလုပ်သူတွေရဲ့ သတင်းရရှိပါက သက်ဆိုင်ရာကို သတင်းပေးပို့ကြဖို့ကိုလည်း ထုတ်ပြန်ထားပါတယ်။
