တရုတ်သံအမတ်ကြီးနှင့်အဖွဲ့ ကျောင်းသုံးပစ္စည်းများနှင့် အလှုငွေများလှူဒါန်း

မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီး H.E Ms. Ma Jia ဦးဆောင်တဲ့အဖွဲ့ဟာ ဩဂုတ်လ (၁၅)ရက်မနက်ပိုင်းက ရှမ်းပြည်နယ်အရှေ့ပိုင်း၊ တာချီလိတ်မြို့သို့ ရောက်ရှိနေပြီး ရန်အောင်မြေရပ်ကွက်၊ ပါလျှံ(၂)ရှိ တာ့ဟွာတရုတ်ဘုံကျောင်းနဲ့ စာသင်ကျောင်းကို ကျောင်းသုံးပစ္စည်းတွေနဲ့ အလှုငွေတွေကို ပေးအပ် လှုဒါန်းခဲ့တယ်လို့သိရပါတယ်။

မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံအမတ်ကြီး ဦးဆောင်တဲ့အဖွဲ့ကို တာ့ဟွာ တရုတ်ဘုံကျောင်း ဥက္ကဌ ဦးအားတီနဲ့ ဆရာ/ဆရာတွေ၊ ကျောင်းသား/သူတွေမှ ကြိုဆိုခဲ့ကြပြီး နောက် တရုတ်ဘုံကျောင်းအတွင်း လှည့်လည်ကြည့်ရှုခဲ့ကြပါတယ်။အဲဒီနောက် စာသင်ခန်းတွေအတွင်း တရုတ်စာသင်ကြားမှု အခြေအနေတွေနဲ့ ကျောင်းဝန်းအတွင်းရှိ တရုတ်ဘုံကျောင်းကို သွားရောက်ကြည့်ရှုပြီး အလှုငွေတွေပေးအပ် လှုဒါန်းတာ၊ တာ့ဟွာ တရုတ်ဘုံကျောင်းရဲ့ ဖြစ်တည်လာမှု ပြုလုပ်ရာ မှတ်တမ်းတွေ ပြသထားမှုကို လှည့်လည်ကြည့်ရှုကာ ဘုံကျောင်းရဲ့ အထူးဧည့် သည်တော် မှတ်တမ်းမှာလက်မှတ်ရေးထိုးခဲ့ကြတယ်လို့သိရပါတယ်။

ဒါ့အပြင် ကျောင်းသား/ကျောင်းသူတွေအတွက် ကျောပိုးအိတ်အလုံး (၃၀၀) ဆရာ/မ များသုံးလက်စွဲအိတ်အလုံး (၂၀၀ )နဲ့ကျောင်းအတွက် ကွန်ပျူတာ အလုံး (၂၀ ) တို့ကိုလည်းပေးအပ်ခဲ့ပါတယ်။အဲဒီနောက်မှာတော့ ဘုံကျောင်းဥက္ကဌ ဦးအားတီက အခုလိုလာရောက်ပြီး ကျောင်းသုံးလက်ဆောင်ပစ္စည်းတွေ လာရောက်ပေးအပ်တဲ့အတွက် ကျေးဇူးတင်ကြောင်း ပြန်လည်ပြောကြားခဲ့ပြီး တရုတ်ဘုံကျောင်းမှ သံအမတ်ကြီးနဲ့အဖွဲ့ကို နေ့လယ်စာနဲ့ တည်ခင်းဧည့်ခံခဲ့တယ်လို့သိရပါတယ်။