ဂျပန်ဝန်ကြီးချုပ် ဖူမီယို ကီရှီဒါက သူ့အနေနဲ့ အာဏာရ လစ်ဘရယ်ဒီမိုကရက်တစ်ပါတီ(LDP)ရဲ့ ခေါင်းဆောင် အဖြစ် ထပ်မံ အရွေးခံတော့မှာ မဟုတ်ဘူးလို့ ပြောလိုက်ပါတယ်။

အသက် ၆၇ နှစ်အရွယ် LDP ပါတီ ဝါရင့် ခေါင်းဆောင် ကီရှီဒါဟာ လာမဲ့ စက်တင်ဘာလအတွင်း ပါတီခေါင်းဆောင်အသစ်ခန့်အပ်မှု ပြုလုပ်ပြီးတဲ့နောက် ဝန်ကြီးချုပ် ရာထူးကနေပါ ဆင်းမယ်လို့ ခန့်မှန်းရပါတယ်။ LDP ပါတီရဲ့ အဂတိလိုက်စားမှု အရှုပ်တော်ပုံ ပေါ်ပေါက်လာတဲ့နောက်ပိုင်းမှာ ကီရှီဒါအပေါ် လူထုထောက်ခံမှုဟာလည်း ကျဆင်းသွားခဲ့ပြီး သူဦးဆောင်တဲ့ ဂျပန်အစိုးရအဖွဲ့ဟာ လူနေမှုစရိတ်ကြီးမြင့်မှုနဲ့ ယန်းငွေတန်ဖိုးကျဆင်းမှုတွေကို ရင်ဆိုင် ကိုင်တွယ်နေခဲ့ရပါတယ်။
ပြီးခဲ့တဲ့ ဇူလိုင်လက ကီရှီဒါအပေါ် လူထုထောက်ခံမှုဟာ ၁၅ ရာခိုင်နှုန်းကျော် ထိုးကျသွားခဲ့ပြီး ဒါဟာ ဆယ်စုနှစ် တစ်ခုအတွင်း ဝန်ကြီးချုပ် တစ်ယောက်အပေါ်မှာ လူထုထောက်ခံမှု အနိမ့်ဆုံးကို ရောက်ရှိသွားခဲ့တာလည်း ဖြစ်ပါတယ်။ ပြီးခဲ့တဲ့နှစ် ဒီဇင်ဘာလထဲမှာ အာဏာရပါတီရဲ့ ဩဇာအရှိဆုံး အစုအဖွဲ့တွေ ပါဝင်ပတ်သက်တဲ့ ရန်ပုံငွေ အရှုပ်တော်ပုံအတွင်း LDP အစိုးရဝန်ကြီးလေးယောက် တစ်ညတည်းမှာ နုတ်ထွက်ခဲ့ရပြီး ဒုဝန်ကြီး ငါးယောက်နဲ့ ပါလီမန်ရေးရာ ဒုဝန်ကြီးတစ်ယောက်လည်း ရာထူးက နုတ်ထွက်ရတဲ့အထဲ ပါဝင်ခဲ့ပါတယ်။

ဒါနဲ့ ပတ်သက်ပြီး ဂျပန်အစိုးရရှေ့နေတွေက LDP ဥပဒေပြုအမတ်တွေဟာ ရန်ပုံငွေရှာဖွေရေးပွဲတွေကနေ အမြတ် အစွန်းတွေရတာ ရှိမရှိဆိုတာကို ရာဇဝတ်မှုဆိုင်ရာ စုံစမ်းစစ်ဆေးမှုတွေ လုပ်နေပါတယ်။ ဒီလိုဖြစ်စဉ်တွေကြောင့် ပါတီပုံရိပ်ကျဆင်းပြီး လာမဲ့ ၂၀၂၅ ခုနှစ် အထွေထွေရွေးကောက်ပွဲမှာ ပါတီအနိုင်ရရေး ကီရှဒါရဲ့ ဦးဆောင်နိုင်စွမ်း အပေါ် မေးခွန်းထုတ်တာတွေရှိနေချိန်မှာ ပါတီခေါင်းဆောင်အဖြစ် ထပ်အရွေးခံမှာ မဟုတ်တော့ဘူးလို့ ကီရှီဒါက ထုတ်ဖော်ပြောဆိုလာခဲ့တာ ဖြစ်ပါတယ်။