တရုတ်နိုင်ငံ သုတေသနအဖွဲ့အစည်းတစ်ခုက အင်ဂျင်နီယာဟောင်းတစ်ယောက်ဟာ နိုင်ငံခြားသူလျှိုအေဂျင်စီ တွေဆီကို အမျိုးအစားခွဲ ကန့်သတ်ထားတဲ့ ပစ္စည်းတွေကို ခွင့်ပြုချက်မရှိဘဲ ရောင်းချခဲ့တာကြောင့် သေဒဏ်ချမှတ် ခံခဲ့ရကြောင်း တရုတ်အာဏာပိုင်တွေဘက်က သတင်းထုတ်ပြန်ထားတာကို BBC သတင်းမှာ ဖော်ပြထားပါတယ်။မတ်လ ၁၉ ရက်က နိုင်ငံတော်လုံခြုံရေးဝန်ကြီးဌာနရဲ့ ထုတ်ပြန်ချက်ထဲမှာ Liu လို့ ခေါ်တဲ့ အင်ဂျင်နီယာဟောင်း တစ်ယောက်ဟာ ကန့်သတ်ထားတဲ့အချက်အလက်တွေကို နိုင်ငံခြားစပိုင်အဖွဲ့အစည်းတွေဆီ ရောင်းချခဲ့တယ်လို့ ဆိုပါတယ်။ ဘယ်အဖွဲ့အစည်းကို ရောင်းခဲ့တယ်ဆိုတာကိုတော့ အတိအကျ ထုတ်ပြောထားတာ မရှိပါဘူး။
Liu ဟာ အလုပ်မှာ ရာထူးတိုးမခံရတာနဲ့ ခွဲခြားဆက်ဆံခံရတယ်ဆိုတဲ့ ခံစားချက်တွေကြောင့် နာကြည်းစိတ်ဝင်ပြီး အခုလို လုပ်ဆောင်ခဲ့တာဖြစ်တယ်လို့လည်း ထုတ်ပြန်ချက်မှာ ပြောထားပါတယ်။ ဒါကြောင့် အလုပ်က နှုတ်ထွက် ခဲ့ပြီး ထွက်စာမတင်ခင်မှာ ကန့်သတ်လျှို့ဝှက်ထားတဲ့ဖိုင်တွေကို ခိုးထားခဲ့တယ်လို့ ဆိုပါတယ်။ အဲဒီဖိုင်တွေကို သုံးပြီး အကျပ်ကိုင် ခြိမ်းခြောက်ဖို့ Liu က ရည်ရွယ်ခဲ့တာဖြစ်ပါတယ်။ သူဟာ သုတေသနဌာနက ထွက်လာပြီးနောက် ရင်းနှီးမြှုပ်နှံရေးလုပ်ငန်းတစ်ခုထဲ ဝင်ခဲ့ပေမယ့် စတော့ဝယ်ရောင်းလုပ်ရင်း အကြွေးပိရာ ကနေ ခိုးထားတဲ့ လျှို့ဝှက်ဖိုင်တွေကို နိုင်ငံခြားထောက်လှမ်းရေးအေဂျင်စီတွေဆီ ရောင်းစားတဲ့အဖြစ်ကို ရောက်ခဲ့ တာဖြစ်ပါတယ်။
ငွေလက်ခံဖို့အတွက်လည်း အွန်လိုင်းအကောင့်တွေ အများကြီး ဖွင့်ခဲ့သလို နာမည်ပေါက် မဟုတ် တဲ့ IC နဲ့ SIM cards တွေ သုံးပြီး ဆက်သွယ်ရေးချန်နယ်တွေ မကြာခဏ ပြောင်းခဲ့တယ်လို့ ဆိုပါတယ်။ ဒါ့ကြောင့် Liu ရဲ့ လှုပ်ရှားမှုတွေကို တရုတ်ထောက်လှမ်းရေးတွေက အနီးကပ် စောင့်ကြည့်ပြီး ဖမ်းဆီးလိုက်တာဖြစ်ပါတယ်။ စုံစမ်းစစ်ဆေးချိန်မှာ Liu က ကျူးလွန်ခဲ့တာတွေကို ဝန်ခံခဲ့ပြီး စုံစမ်းစစ်ဆေးမှုအပြီးမှာတော့ Liu ကို သေဒဏ် ချမှတ်လိုက်တယ်လို့ တရုတ်အစိုးရဌာနက ပြောပါတယ်။
