အပြုသဘောဆောင်တဲ့ ဆွေးနွေးပွဲလို့ သတ်မှတ်ကြတဲ့ အမေရိကန်နဲ့တရုတ်တို့ရဲ့ ဆွေးနွေးပွဲမှာ ပါဝင်တဲ့ နှစ်ဖက် စလုံးက ထိပ်တန်းအရာရှိတွေဟာ ရက် ၉၀ သွင်းကုန်ခွန်ကောက်ခံမှု ရပ်စဲထားရေးကာလ ဆက်လက် သက်တမ်း တိုးရေးနဲ့ပတ်သက်ပြီး ဆက်လက်လုပ်ဆောင်သွားဖို့ကိုသာ သဘောတူကြပြီး နှစ်ရက်တာ ဆွေးနွေးပွဲကို အဆုံး သတ်ခဲ့ကြတယ်လို့ BBC သတင်းမှာ ဖော်ပြပါတယ်။
အမေရိကန်ဘဏ္ဍာရေးဝန်ကြီး Scott Bessent က ဘယ်လိုသက်တမ်းတိုးမှုမျိုးမဆို သမ္မတ ထရမ့်အပေါ်မှာသာ မူတည်တယ်လို့ ပြောကြားခဲ့ပါတယ်။သမ္မတထရမ့်ကတော့ ဆွေးနွေးညှိနှိုင်းနေတဲ့ကိစ္စနဲ့ပတ်သက်လို့ ဘဏ္ဍာရေးဝန်ကြီး Scott Bessent ကို ပြောဆို ထားပြီး ဖြစ်တယ်လို့ စကော့တလန်ကနေအပြန် Air Force One လေယာဉ်ပေါ်မှာ သတင်းထောင်တွေကို ပြောထားပါတယ်။ နှစ်ဖက်စလုံးက တစ်ဖက်နဲ့တစ်ဖက် ဆန့်ကျင်တဲ့ အစီအမံအချို့ကို ယာယီဆိုင်းငံ့ထားမယ်လို့ ပြောကြားခဲ့မှုအရ ဘေဂျင်းနဲ့ဝါရှင်တန်တို့ဟာ သွင်းကုန်ခွန် ကောက်ခံမှု ရပ်စဲရေးကာလကို ဆက်ထိန်းထားရေးအတွက် တွန်းအား ပေးဖို့ သဘောတူခဲ့ကြတယ်လို့ တရုတ် ကုန်သွယ်ရေးညှိနှိုင်းရေးမှူး လီချန်ဂန်း (Li Chenggang)ကတာ့ ပြောပါတယ်။
ဆွီဒင်နိုင်ငံ၊ စတော့ဟုမ်းမှာ ကျင်းပခဲ့တဲ့ စေ့စပ်ညှိနှိုင်းမှုဟာ ဩဂုတ်လမှာ ကုန်ဆုံးတော့မယ့် ရက် ၉၀ အခွန် ကောက်ခံမှု ရပ်စဲထားရေးကာလနဲ့ပတ်သက်တာဖြစ်ပြီး ဒီရပ်ဆိုင်းကာလ ကုန်ဆုံးမှုက နှစ်နိုင်ငံအကြား အပြန်အလှန် သွင်းကုန်ခွန်စည်းကြပ်မှုတွေ တိုးမြင့်လာပြီးတဲ့နောက် ဧပြီလက ဖြစ်ပေါ်ခဲ့တဲ့ မတည်ငြိမ်မှုတွေ ပြန်ဖြစ်ပေါ်လာစေမယ်ဆိုတဲ့ ခြိမ်းခြောက်မှုကို တိုးလာစေနေပါတယ်။
