ဂျပန်နိုင်ငံမှာ ၂၀၂၄ ခုနှစ်က မွေးဖွားသူထက် သေဆုံးသူ တစ်သန်းနီးပါးပိုများခဲ့ပါတယ်။ ဒါဟာ ၁၉၆၈ ခုနှစ်နောက်ပိုင်း အဆိုးဆုံး နှစ်စဉ်လူဦးရေကျဆင်းမှုဖြစ်ပြီး ဝန်ကြီးချုပ် ရှိဂဲရုအိရှိဘက ဒါကို quiet emergency လို့ ဖော်ြပခဲ့တယ်လို့ BBC သတင်းမှာ ပါရှိပါတယ်။အစိုးရက ကလေးစောင့်ရှောက်မှုတွေ အခမဲ့ပေးတာ အလုပ်ချိန်ညှိနှိုင်းပေးတာမျိုးတွေ လုပ်ဆောင်နေပေမယ့် မွေးဖွားနှုန်းမြှင့်တင်ဖို့ ခက်ခဲနေတုန်းပါပဲ။
အဓိကပြဿနာတွေကတော့ နေထိုင်စရိတ်ကြီးတာ၊ လုပ်ခလစာနည်းတာနဲ့ အလုပ်ချိန်တင်းကျပ်တာတွေကြောင့် လူငယ်တွေအိမ်ထောင်ပြုဖို့နဲ့ ကလေးယူဖို့ တွန့်ဆုတ်နေကြတာပါ။ အထူးသဖြင့် အမျိုးသမီးတွေ ကလေးပြုစုစောင့်ရှောက်ရာမှာ အကူအညီနည်းတာနဲ့ ကျားမခွဲခြားတဲ့ပြဿနာတွေ ရှိနေတာပါ။လက်ရှိမှာ ဂျပန်ရဲ့လူဦးရေက ၁၂၄ ဒသမ ၃ သန်း အထိ ကျဆင်းသွားပြီး အသက် ၆၅ နှစ်နဲ့အထက် သက်ကြီးရွယ်အိုတွေက လူဦးရေရဲ့ ၃၀ ရာခိုင်နှုန်းနီးပါးရှိလာပါတယ်။ ဒါကြောင့် ပင်စင်နဲ့ ကျန်းမာရေးစောင့်ရှောက်မှုစနစ်တွေအတွက် ဖိအားတွေတိုးလာပါတယ်။ အလုပ်လုပ်နိုင်တဲ့အရွယ် လူဦးရေကလည်း ၆၀ ရာခိုင်နှုန်းကိုကျဆင်းခဲ့ပြီး မြို့ပြနဲ့ကျေးရွာတွေမှာလည်း အနှစ်နှစ်ဆယ်အတွင်း အိမ်ပေါင်း ၄ သန်းနီးပါး စွန့်ပစ်ခံခဲ့ရပါတယ်။
ဒါ့အပြင် အစိုးရအနေနဲ့ လုပ်သားအင်အားလိုအပ်ချက်ကြောင့် ပြည်ပလုပ်သားတွေကို ခေါ်ယူဖို့ ကြိုးစားပေမယ့် ရှေးရိုးစွဲနိုင်ငံဖြစ်တာကြောင့် နိုင်ငံရေးအရ အငြင်းပွားစရာတွေဖြစ်နေပါတယ်။ ကျွမ်းကျင်သူတွေကလည်း ၁၉၇၀ ပြည့်လွန်နှစ်တွေကတည်းက ကျဆင်းနေတဲ့ မွေးဖွားနှုန်းကို ချက်ချင်းပြောင်းလဲဖို့ခက်ပြီး ဆယ်စုနှစ်များစွာ အချိန်ယူပြင်ဆင်ရမယ်လို့ သတိပေးထားပါတယ်။
