တရုတ်နိုင်ငံဟာ DeepSeek founder လို လူတော်တွေ မွေးထုတ်နိုင်ဖို့အတွက် မြို့တော်ဘေဂျင်းရှိ မူကြိုနဲ့ မူလတန်းကျောင်းတိုင်းမှာ AI သင်ခန်းစာတွေ ထည့်သင်ပြီး AI နည်းပညာကို မျိုးဆက်သစ် ကလေးတိုင်း တတ်မြောက်အောင် သင်ကြားပေးနေတယ်လို့ Techcrunch သတင်းမှာ ရေးသားထားပါတယ်။
အသက် ၆ နှစ်အရွယ်ကစပြီး AI ပညာသင်ပေးမယ့် ဒီစီမံကိန်းကို အခုစာသင်နှစ်မှာ စတင်မှာဖြစ်ကာ ပညာသင် နှစ်တိုင်းမှာ အနည်းဆုံး AI သင်ခန်းစာ ၈ နာရီ သင်ရမယ်လို့ ပြဋ္ဌာန်းထားပါတယ်။ ဒီသင်တန်းတွေကနေ AI chatbots နဲ့ တခြား tools တွေ သုံးနည်းကို သင်ပေးသွားမှာဖြစ်သလို AI နည်းပညာဆိုင်ရာ သိသင့်တဲ့ ဗဟုသုတ တွေနဲ့ AI ကျင့်ဝတ်တွေလည်း ပါဝင်မယ်လို့ ဆိုပါတယ်။ ဘေဂျင်းပညာရေးကော်မရှင်ရဲ့ ထုတ်ပြန်ချက်ထဲမှာတော့ ကျောင်းတွေအနေနဲ့ AI သင်ခန်းစာတွေကို သတင်း အချက်အလက်နဲ့ သိပ္ပံတန်းတွေထဲမှာ ထည့်ပေါင်းသင်နိုင်သလို AI နည်းပညာအတန်းဆိုပြီး သီးသန့်ခွဲသင်လို့ လည်း ရတယ်လို့ ဆိုပါတယ်။
လောလောဆယ် AI သင်ရိုးထည့်သင်ဖို့ ကျောင်းပေါင်း ၁၈၄ ကျောင်း ရွေးချယ် ထားပြီး AI ဟာ နိုင်ငံ့ပညာရေးစနစ်အတွက် ‘ရွှေသော့’ပဲလို့ ပညာရေးဝန်ကြီးက ကြွေးကြော်ထားပါတယ်။ တစ်ကမ္ဘာလုံးကို DeepSeek နဲ့ ခြောက်ခြားစေခဲ့ပြီးနောက် တရုတ်ဟာ AI နည်းပညာကို အရှိန်မြှင့် အားပေး အကောင်အထည်ဖော်နေတာဖြစ်ပါတယ်။ တရုတ်နိုင်ငံရဲ့အခုပညာရေးစီမံကိန်းကနေ နောင်တစ်ချိန်မှာ ကမ္ဘာကြီး ကို ပြောင်းလဲခြိမ်းခြောက်တွန်းလှန်နိုင်မယ့်ကလေးတွေ အများအပြား ပေါ်ပေါက်လာနိုင်မယ်ဆိုတဲ့ ခန့်မှန်းချက် တွေလည်း ရှိနေတာဖြစ်ပါတယ်။
