ရခိုင်ပြည်နယ်အတွင်း၂၀၂၅ ခုနှစ် တက္ကသိုလ်ဝင်စာမေးပွဲကို မတ်လ(၁၇)ရက်က စတင်ကျင်းပနေရာမှာ ပထမ ဦးဆုံးနေ့ မြန်မာစာဘာသာရပ်ကို လာရောက်ဖြေဆိုသူဦးရေ(၁၅၆၄)ယောက်ရှိတယ်လို့ ပညာရေးဝန်ကြီးဌာန ကနေ သိရပါတယ်။
ရခိုင်ပြည်နယ်အတွင်း၂၀၂၅ ခုနှစ်၊တက္ကသိုလ်ဝင်စာမေးပွဲအတွက် စာစစ်ဌာနတွေအနေနဲ့ စစ်တွေမြို့မှာ ၄ ခု၊ ကျောက်ဖြူမြို့နယ်မှာ ၂ ခု၊ မာန်အောင်မြို့နယ်မှာ ၂ ခု စုစုပေါင်း စာစစ်ဌာန(၈)ခု ဖွင့်လှစ်ထားပြီး ဝင်ရောက် ဖြေဆိုဖို့ စာရင်းပေးထားသူ(၃၂၆၄)ယောက် ရှိခဲ့တယ်လို့ သိရပါတယ်။
တက္ကသိုလ်ဝင်တန်းစာမေးပွဲလာရောက်ဖြေဆိုတဲ့သူတွေကို ရခိုင်ပြည်နယ်ဝန်ကြီးချုပ် ဦးထိန်လင်းနဲ့ ပြည်နယ် အစိုးရအဖွဲ့ဝင်ဝန်ကြီးတွေက မတ်လ(၁၇)ရက်နေ့မှာ သွားရောက်အားပေးခဲ့ကြပါတယ်။
ပြီးခဲ့တဲ့၂၀၂၄ ခုနှစ်၊တက္ကသိုလ်ဝင်စာမေးပွဲမှာတော့ ရခိုင်ပြည်နယ်အတွင်းမှာ ကျောင်းသား/ ကျောင်းသူ တစ်သောင်းရှစ်ထောင်ကျော် ဝင်ရောက်ဖြေဆိုခဲ့ပြီး အောင်မြင်သူ(၅၂၅၃)ယောက်ရှိတဲ့အနက် ဂုဏ်ထူး ရရှိ သူ(၁၃၀၃)ယောက် ရှိခဲ့တယ်လို့ သိရပါတယ်။
