Starting Point စီးပွားရေးအိုင်ဒီယာပြိုင်ပွဲကို မတ်လ ၃၀ ရက်ကစတင်ပြီး ရန်ကုန်မြို့၊ တာမွေမြို့နယ်၊ ရွှေထွဋ်တင်ကွင်းရှိ HEXAGON STUDIO မှာ ကျင်းပရိုက်ကူးနေပြီဖြစ်ပြီး ပြိုင်ပွဲနဲ့ပတ်သက်တဲ့ သတင်းစာ ရှင်းလင်းပွဲကိုလည်း ကျင်းပခဲ့ပါတယ်။ ဒီအစီအစဉ်ကို ရွှေသံလွင်မီဒီယာကုမ္ပဏီလိမိတက်နဲ့ Sky Production က စီစဉ်ထုတ်လုပ်တာဖြစ်ပါတယ်။

အသေးစား၊ အငယ်စား၊ အလတ်စား စီးပွားရေးလုပ်ငန်း စတင်တည်ထောင်လုပ်ကိုင်ထူထောင်ချင်တဲ့သူတွေနဲ့ လုပ်ငန်းထူထောင်လည်ပတ်နေပြီး လုပ်ငန်းချဲ့ထွင်ကြသူတွေက မိမိတို့ရဲ့ စီးပွားရေးအိုင်ဒီယာတွေကို ပေးပို့ပြီး ဝင်ရောက်ယှဉ်ပြိုင်ကြတာဖြစ်တယ်လို့ သိရပါတယ်။
ပြိုင်ပွဲဝင်ရောက်ယှဉ်ပြိုင်ကြဖို့ စာရင်းပေးသွင်းထားသူ အယောက် ၂၀ ကျော်လောက်ရှိပေမယ့် လက်ရှိအခြေ အနေကြောင့် ပြိုင်ပွဲကို ဝင်ရောက်ယှဉ်ပြိုင်ကြမယ့် ဦးရေကတော့ ၁၇ ယောက်ရှိပြီး ဆုကြေးငွေအနေနဲ့ကတော့ ကျပ်သိန်း ၅၀၀ ချီးမြှင့်သွားမှာဖြစ်တယ်လို့ Starting Point Program ရဲ့ Executive Produer ဦးရဲမင်းဦးက ပြောပါတယ်။

ဒီပြိုင်ပွဲမှာ ဒိုင်တွေအဖြစ် Blue Ocean Investment ကုမ္ပဏီလီမိတက်ရဲ့ Chairman & Group CEO ဦးထွန်းထွန်းနိုင်၊ သမ္မတနိဗ္ဗာန်ကုန်နဲ့ သင်္ကန်းတိုက်ပိုင်ရှင် ဦးနေအောင်ကို၊ Kathryn Beauty နဲ့ စိန်နဲ့မြမွေ့ရာရဲ့ မန်နေဂျင်းဒါရိုက်တာ ဒေါက်တာ ကေသရီကျော်နဲ့ Shwe Zee Kwat Food Manufacture & Int’I Export ကုမ္ပဏီလီမိတက်ရဲ့ မန်နေဂျင်းဒါရိုက်တာ ဒေါ်အိပိုးဖြူတို့က ပါဝင်အကဲဖြတ်ကြမှာဖြစ်တယ်လို့ ဆိုပါတယ်။
ဒါ့အပြင် ပြိုင်ပွဲအစီအစဉ်ကို Sky Net ရုပ်သံလိုင်းတွေမှာ ထုတ်လွှင့်ပြသသွားမှာဖြစ်ပြီး ပြသမယ့်အချိန်နဲ့ နေ့ရက်ကို ထပ်မံကြေညာပေးသွားမယ်လို့ သိရပါတယ်။