စက်သုံးဆီရောင်းချရာမှာ Bar Code/QR Code တွေ Scan မဖတ်ဘဲ ရောင်းချနေတဲ့ အရောင်းဆိုင် ၃၀ ကို နောက်ဆုံး အကြိမ် သတိပေးထားပြီး ထပ်မံ စစ်ဆေးတွေ့ရှိပါက ထိရောက်စွာ အရေးယူသွားမှာ ဖြစ်တယ်လို့ စွမ်းအင်ဝန်ကြီး ဌာနက မတ် ၂၈ ရက်မှာ အသိပေးထုတ်ပြန်ထားပါတယ်။
ပြည်သူတွေအနေနဲ့ စက်သုံးဆီဝယ်ယူရာမှာ တွေ့ကြုံရတဲ့ အခက်အခဲတွေ သတင်းထုတ်ပြန်ချက်တွေအပေါ် သိရှိမေး မြန်းလိုတာတွေ ရှိရင်လည်း စွမ်းအင်ဝန်ကြီးဌာန Call Center ဖုန်းနံပါတ် ၀၉-၄၄၀၄၃၃၃၂၄ နဲ့ ၀၉-၈၉၉၁၂၉၂၉၆ ကို ဆက်သွယ်မေးမြန်းနိုင်တယ်လို့ ဆိုပါတယ်။အရောင်းဆိုင်တွေက စက်သုံးဆီရောင်းချရာမှာ သတ်မှတ်ရည်ညွှန်းဈေးနှုန်းထက် မြှင့်တင်ရောင်းချတာ၊ စက်သုံးဆီကို သတ်မှတ်ပမာဏအတိုင်း ရောင်းမပေးတာ၊ စက်သုံးဆီ ရှိလျက်နဲ့ ရောင်းမပေးတာ၊ Bar Code/QR Code တွေ Scan မဖတ်ဘဲ ရောင်းချနေတာ၊ ပုံး၊ ပီပါတွေနဲ့ တရားမဝင် ထုတ်ယူရောင်းချနေတာတွေ တွေ့ရှိရင် Call Center ဖုန်းနံပါတ် တွေကို ဆက်သွယ်တိုင်ကြားနိုင်တာလို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် အချက်အလက်ပြည့်စုံစွာ တိုင်ကြားလာမှုတွေအပေါ် ထိရောက်စွာ အရေးယူဆောင်ရွက်မှုအနေနဲ့ မန္တလေး တိုင်းဒေသကြီး၊ စဉ့်ကိုင်မြို့နယ်၊ ပုလိပ်ကျေးရွာ၊ ရန်ကုန်-မန္တလေး လမ်းဟောင်းပေါ်ရှိ စိန်စီအောင် စက်သုံးဆီအရောင်း ဆိုင်ကို စီမံခန့်ခွဲရေး နည်းလမ်းအရ လိုင်စင်ယာယီပိတ်သိမ်းထားပြီး အဲဒီ အရောင်းဆိုင် နဲ့ သက်ဆိုင်တဲ့ တာဝန်ရှိသူ အဆင့်ဆင့်ကိုလည်း ဥပဒေနဲ့အညီ ထိရောက်စွာ အရေးယူနိုင်ရေး ဆောင်ရွက်နေတယ်လို့ ထုတ်ပြန်ချက်မှာ ဖော်ပြထား ပါတယ်။
