ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီက အလုပ်အကိုင်အခွင့်အလမ်းပေါင်း တစ်ထောင်ကျော် ဖန်တီး ပေးနိုင်တဲ့ ရင်းနှီးမြှုပ်နှံမှုလုပ်ငန်း (၃)ခုကို ခွင့်ပြုပေးခဲ့တယ်လို့ ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီ က ထုတ်ပြန်ထားပါတယ်။
ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီအစည်းအဝေးကို ဇန်နဝါရီ ၂၈ ရက်က ကျင်းပခဲ့ပြီး ရန်ကုန်တိုင်းဒေသကြီး ရင်းနှီးမြှုပ်နှံမှု ကော်မတီဥက္ကဋ္ဌ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း တက်ရောက်ခဲ့တယ်လို့ သိရပါတယ်။
အစည်းအဝေးမှာ ဟိုတယ်နဲ့ခရီးသွားကဏ္ဍ၊ ဝန်ဆောင်မှုကဏ္ဍနဲ့စက်မှုကဏ္ဍတို့မှာ ရာနှုန်းပြည့် မြန်မာနိုင်ငံသား ရင်းနှီးမြှုပ်နှံမှု လုပ်ငန်း(၁)ခုနဲ့ နိုင်ငံခြားရင်းနှီးမြှုပ်နှံမှုလုပ်ငန်း(၂) ခုတို့ကို ခွင့်ပြုပေးခဲ့တာပါ။
ခွင့်ပြုပေးခဲ့တဲ့ လုပ်ငန်းတွေကတော့ ဟိုတယ်ဝန်ဆောင်မှုလုပ်ငန်း၊ အဆင်သင့် ဖျော်စပ်ပြီးတဲ့ ကွန်ကရစ်တွေ ရောင်းချတဲ့ ဝန်ဆောင်မှုပေးတဲ့လုပ်ငန်းနဲ့ CMP စနစ်နဲ့ အဝတ်အထည်အမျိုးမျိုး ချုပ်လုပ်တဲ့ လုပ်ငန်းတို့ ဖြစ်ပါတယ်။
ခွင့်ပြုပေးခဲ့တဲ့ လုပ်ငန်းတွေရဲ့ ရင်းနှီးမြှုပ်နှံမှု ပမာဏဟာ ငွေကျပ် သန်း ၈၀၀ နဲ့ အမေရိကန်ဒေါ်လာ ၆ သန်း နီးပါးဖြစ်ပြီး အလုပ်အကိုင် အခွင့်အလမ်းပေါင်း တစ်ထောင်ကျော်အတွက် ဖန်တီးပေးနိုင်မှာ ဖြစ်တယ်လို့ သိရပါတယ်။
