ပြည်တွင်းကထွက်ရှိနေတဲ့ ပဲစင်းငုံတွေကို အိန္ဒိယဘက်က ဝယ်ယူမှုနည်းနေတဲ့အတွက် စျေးကျဆင်းနေတယ်လို့ မကွေးတိုင်းဒေသကြီး တောင်သူဖွံ့ဖြိုးရေးအဖွဲ့ဥက္ကဋ္ဌက ပြောပါတယ်။ မကွေးတိုင်းအတွင်းကထွက်ရှိတဲ့ ပဲစင်းငုံတွေကို တောင်သူဖွံ့ဖြိုးရေးအဖွဲ့က ရေနံချောင်းနဲ့မကွေးမြို့တွေမှာ စုပေါင်းရောင်းချပွဲလုပ်ပြီး အရောင်း အဝယ် လုပ်နေကြတာဖြစ်ပါတယ်။
ရေနံချောင်းစင်တာမှာ ပဲစင်းငုံစုပေါင်းရောင်းချပွဲကို ပြီးခဲ့တဲ့ ဒီဇင်ဘာ(၂၆)ရက်နေ့ကစတင်ခဲ့ပြီး တစ်တင်းကို ငွေကျပ်(၁)သိန်းကျော်အထိ ရောင်းချခဲ့ရပေမယ့် လက်ရှိမှာတော့ တစ်တင်းကို ငွေကျပ် ၉၄၀၀၀ ဝန်းကျင် စျေးသာ ရှိနေတာပါ။ အဲဒါကြောင့် တောင်သူတွေ စျေးကောင်းရဖို့အတွက် ပစ္စည်းကို လှောင်ထားပြီး စျေးစောင့် ရောင်းနိုင်အောင် စီစဥ်ထားတယ်လို့ မကွေးတိုင်းဒေသကြီး တောင်သူဖွံ့ဖြိုးရေးအဖွဲ့ ဥက္ကဋ္ဌ ဦးဟန်ညွန့်က ပြောပါတယ်။
ပဲစင်းငုံရောင်းချရာမှာ မန္တလေး၊ပခုက္ကူ စျေးကွက်တွေအပေါ်မူတည်ပြီး အရောင်းအဝယ်လုပ်နေကြတာဖြစ်ပြီး မကွေးစင်တာ ပဲစဥ်းငုံစုပေါင်းရောင်းချပွဲကိုတော့ ဇန်နဝါရီ(၆)ရက်ကနေ ဖေဖော်ဝါရီ(၆)ရက်နေ့အထိ ပြုလုပ် သွားမှာဖြစ်ပါတယ်လို့ သိရပါတယ်။
