ဖူဂျီတောင် ပေါက်ကွဲနိုင်တဲ့ အရိပ်လက္ခဏာတွေ မြင်တွေ့နေရတာကြောင့် တိုကျိုမြို့မှာရှိတဲ့ ဒေသခံတွေအနေနဲ့ ကြိုတင်ပြင်ဆင်တာတွေ ဆောင်ရွက်ထားကြဖို့ ဂျပန် ကျွမ်းကျင်သူပညာရှင်တစ်ယောက်က မတ် ၂၁ ရက် မှာ သတိပေးလာတာကို CNA သတင်းမှာ ဖော်ပြထားပါတယ်။ဖူဂျီတောင်ဟာ ပြင်းအားအတိုင်း ပေါက်ကွဲလာရင် တိုကျို၊ ကာနာဂါဝါစီရင်စုနဲ့ အနီးတစ်ဝိုက်ရှိ ဒေသတွေမှာ ပြာထု ၁၀ စင်တီမီတာထက်မနည်း ဖုံးလွှမ်းနိုင်ကြောင်း ကျွမ်းကျင်ပညာရှင်တွေက သတိပေးထားပါတယ်။ အထူးသဖြင့် မိုးရေနဲ့ ပြိုကျလာရင် အိမ်တွေ ပျက်စီးသွားနိုင်ချေရှိတယ်လို့လည်း သတင်းတွေ ထုတ်ပြန် ထားပါတယ်။
ဖြစ်နိုင်ရင် ဒေသခံတွေအနေနဲ့ နှစ်ပတ်စာအတွက် ရိက္ခာတွေအပြင် အရေးတကြီး လိုအပ်တာတွေကိုလည်း စုဆောင်းထားကြဖို့ အကြံပြုထားပါတယ်။ အဓိကကျတဲ့ အခြေခံအဆောက်အဦတွေကို ထိန်းသိမ်းဖို့နဲ့ ပြုပြင်တာတွေကိုလည်း အလေးထားလုပ်ကြဖို့ ဒေသဆိုင်ရာအာဏာပိုင်တွေနဲ့ စီးပွားရေးလုပ်ငန်းရှင်တွေကို တိုက်တွန်းထားပါတယ်။ဂျပန်အစိုးရခန့်အပ်ထားတဲ့ ပညာရှင်အဖွဲ့က ဖူဂျီတောင် အကြီးအကျယ်ပေါက်ကွဲပြီး ပြာအမြောက်အမြား ထွက်လာရင် ဖြေရှင်းရမယ့် နည်းလမ်းတွေကို ကြိုတင်ရှာဖွေကြဖို့အတွက် အဆိုပြုလာတာ ဖြစ်ပါတယ်။ ဂျပန်နိုင်ငံမှာ အမြင့်ဆုံးတောင်ဖြစ်တဲ့ ဖူဂျီတောင်ဟာ လွန်ခဲ့တဲ့နှစ်ပေါင်း ၃၀၀ ကျော်က နောက်ဆုံးအကြိမ် ပေါက်ကွဲခဲ့တာဖြစ်ပါတယ်။
မီးတောင်ပြာတွေ သုံးစင်တီမီတာထုအထိ ကျလာရင် လျှပ်စစ်ဓာတ်အား ကြာကြာပြတ်တောက်နိုင်ပြီး ကျောက်ကပ်ဆေးစက် အသုံးပြုနေသူတွေနဲ့ ပြုစုစောင့်ရှောက်ဖို့လိုတဲ့ လူနာတွေကို ဘေးလွတ်ရာ ကြိုတင် နေရာရွှေ့ပြောင်း ထားသင့်ကြောင်းလည်း ပညာရှင်တွေက တိုက်တွန်းထားပါတယ်။ ဒါ့ကြောင့် အစိုးရအနေနဲ့ မီးတောင်ပြာခန့်မှန်းချက်တွေအပါအဝင် သတင်းအချက်အလက် ဖြန့်ဝေမယ့် စနစ်တစ်ခုကို ဖော်ဆောင်ထားသင့်ကြောင်းနဲ့ ဘေးကင်းစေမယ့် ရွှေ့ပြောင်းရေးလမ်းကြောင်းတွေ ကြိုတင်စီစဉ်ထားသင့်ကြောင်းကိုလည်း ပညာရှင်တွေက အကြံပြုထားပါတယ်။
