ကရင်ပြည်နယ်ရဲ့ အထင်ကရဖြစ်တဲ့ဘားအံမြို့နယ်က ဇွဲကပင်တောင်မှာ မတ်လ ၂၃ ရက်၊ ညနေပိုင်းကစကာ တောမီးလောင်တာတွေ ဖြစ်ပွားခဲ့ပြီး မတ်လ ၂၅ ရက်မှာတော့ မီးလောင်မှုအခြေအနေကို ထိန်းချုပ်ထားနိုင်ပြီ ဖြစ်တယ်လို့ ကရင်ပြည်နယ် ဘားအံခရိုင် မီးသတ်ဦးစီးဌာနကနေ သိရပါတယ်။
အဲဒီတောမီးဟာ မတ်လ ၂၃ ရက်နေ့မှာ ဇွဲကပင်တောင်ရဲ့ အနောက်ဘက် လုမ္ဗိနီဥယျာဉ်ဘက်မှာ နေ့လယ် ၁၂ နာရီလောက်က စတင်လောင်ကျွမ်းခဲ့တာဖြစ်ပြီး ညနေ ၆ နာရီနောက်ပိုင်းမှာ ပိုမိုလောင်ကျွမ်းခဲ့တာဖြစ်တယ်လို့ ဆိုပါတယ်။ဇွဲကပင်တောင် တောမီးဟာ ဘားအံမြို့နယ်၊ တော်ပုံကျေးရွာ၊ ဒန့်သလွန်ဘုန်းကြီးကျောင်း အနောက်ဘက်နဲ့ ဇွဲကပင် ဟိုတယ် အနောက်ဘက် (၂)နေရာမှာ ဇွဲကပင်တောင်ခြေကနေ အမြင့်ပေ (၅၀၀)လောက်အထိ ဖြစ်တယ်လို့ မြန်မာနိုင်ငံ မီးသတ်တပ်ဖွဲ့က ထုတ်ပြန်ထားပါတယ်။ဇွဲကပင်တောင်မှာ တောမီးလောင်ကျွမ်းတာကတော့ နှစ်စဉ် ဖြစ်ပွားနေကျဖြစ်ပေမဲ့ အခုဖြစ်ပွားနေတဲ့ တောမီးက တော့ အရင်နှစ်တွေကထက် ပိုများတယ်လို့ ဆိုပါတယ်။
ဇွဲကပင်တောင် ပေ ၂၀၀ အထက်ကနေ ကျလာတဲ့ မီးဆွယ်မီးပွားတွေဟာ တောင်ခြေမှာရှိတဲ့ ဟိုတယ်၊ တည်းခို ခန်းတွေနဲ့ ရာဘာခြံတွေ စတဲ့ မီးကူးစက်စေနိုင်မယ့်နေရာတွေကို မီးမကူးစက်စေဖို့ ဘားအံမြို့နယ် မီးသတ်တပ်ဖွဲ့ နဲ့ အရပ်ဘက် ပရဟိတ မြန်မာနိုင်ငံလူမှုကယ်ဆယ်ရေးအဖွဲ့တို့ ပူးပေါင်းပြီး နည်းလမ်းအမျိုးမျိုးနဲ့ ငြှိမ်းသတ်ခဲ့ တယ်လို့ ဘားအံခရိုင် မီးသတ်ဦးစီးဌာန မီးသတ်ဦးစီးမှူး ဦးသန့်ဇင်ဝင်းက ပြောပါတယ်။ကရင်ပြည်နယ်ရဲ့ အထင်ကရဖြစ်တဲ့ ဇွဲကပင်တောင်ဟာ ဘားအံမြို့ရဲ့ တောင်ဘက် ၇ မိုင်အကွာမှာရှိပြီး ပင်လယ်ရေမျက်နှာပြင်အထက် ပေပေါင်း နှစ်ထောင်ကျော် အမြင့်ရှိတယ်လို့ သိရပါတယ်။
