မတ်လ(၂၈)ရက်ကနေ (၃၁)ရက်အထိ (၄)ရက်အတွင်း မြေငလျင်(၃၆)ကြိမ် လှုပ်ခတ်ခဲ့တယ်လို့ မိုးလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ပါတယ်။
မတ်လ(၂၈)ရက် မြန်မာ စံတော်ချိန် နေ့လယ် ၁၂ နာရီ ၅၁ မိနစ် ၂ စက္ကန့် အချိန်က အင်အား ရစ်ချ်စတာစကေး ၇ ဒသမ ၇ အဆင့်ရှိတဲ့ အင်အားပြင်းငလျင်လှုပ်ခတ်ခဲ့ပြီး နောက်ဆက်တွဲ မြေငလျင်တွေ ထပ်မံလှုပ်ခဲ့ရာ မတ်လ(၃၁)ရက် မနက်အစောပိုင်းအထိ ငလျင်လှုပ်ခတ်မှု အကြိမ်ရေပေါင်း (၃၆)ကြိမ် ရှိခဲ့တာဖြစ်ပါတယ်။
ငလျင်လှုပ်ခတ်မှုအနေနဲ့မတ်လ(၂၈)ရက်မှာ ငလျင်လှုပ်ခတ်မှု အကြိမ်ပေါင်း (၁၃)ကြိမ်၊ မတ်လ(၂၉)ရက်မှာ (၁၁)ကြိမ် ရှိခဲ့တယ်လို့ ဆိုပါတယ်။ ဒါ့အပြင် မတ်လ(၃၀)ရက်က (၁၀)ကြိမ် ထပ်မံလှုပ်ခတ်ခဲ့ပြီး မတ်လ(၃၁) ရက်မှာ မနက်ပိုင်းအတွင်း (၂)ကြိမ် လှုပ်ခတ်ခဲ့တယ်လို့ သိရပါတယ်။
အခုလို ငလျင်တွေ လှုပ်ခတ်ရာမှာ မတ်လ(၂၈)ရက်ကနေ (၃၁)ရက် အစောပိုင်းထိ လှုပ်ခတ်ခဲ့တဲ့ ငလျင်တွေ အနက် ပြင်းအား ရစ်ချ်စတာစကေး ၇ ဒသမ ၇ အဆင့်ရှိတဲ့ ငလျင်က အပြင်းထန်ဆုံးဖြစ်ပြီး အားအနည်းဆုံး လှုပ်ခတ်ခဲ့တဲ့ ငလျင်ကတော့ ရစ်ချ်စတာစကေး ၂ ဒသမ ၈ အဆင့်ရှိတယ်လို့ မိုးလေဝသနှင့်ဇလဗေဒညွှန်ကြားမှု ဦးစီးဌာနရဲ့ ထုတ်ပြန်ချက်အရ သိရပါတယ်။
