အခု ၂၀၂၄ – ၂၀၂၅ ဘဏ္ဍာနှစ် ဧပြီလကနေ ဖေဖော်ဝါရီလအထိ ၁၁ လအတွင်း ပြည်ပကို ပဲမျိုးစုံ တန်ချိန် ၁ သမ ၈ သန်းကျော် တင်ပို့ခဲ့ပြီး ပို့ကုန်တန်ဖိုးအနေနဲ့ အမေရိကန်ဒေါ်လာ ၁ ဒသမ ၅၈ ဘီလီယံကျော် ရရှိထားတယ်လို့ စီးပွားရေးနဲ့ကူးသန်းရောင်းဝယ်ရေးဝန်ကြီးဌာနက သိရပါတယ်။
အခုဘဏ္ဍာနှစ်အတွင်း ပြည်ပကို ပဲမျိုးစုံတင်ပို့မှုကနေ ဝင်ငွေ အမေရိကန်ဒေါ်လာ ၁ ဒသမ ၇ ဘီလီယံကျော် ရရှိဖို့ လျာထားတာဖြစ်ပါတယ်။
ပြည်တွင်းစားသုံးမှု ပိုလျှံတဲ့ပဲတွေကို ပြည်ပကို တိုးမြှင့်တင်ပို့နိုင်ဖို့အတွက် ပြည်ပ ဈေးကွက်လိုအပ်ချက်ကို လေ့လာနေပြီး တိုးချဲ့စိုက်ပျိုးသင့်တဲ့ပဲအမျိုးအစား၊ အထွက်နှုန်းတိုးဖို့အတွက်လိုအပ်ချက်တွေ၊ ဈေးကွက်ဈေးနှုန်း တွေနဲ့ တန်ဖိုးမြင့်ထုတ်ကုန်တိုးမြှင့်ထုတ်လုပ်နိုင်ဖို့ ဆောင်ရွက်နေတယ်လို့ သိရပါတယ်။ မြန်မာနိုင်ငံကနေ မတ်ပဲနဲ့ ပဲစင်းငုံကို အိန္ဒိယဈေးကွက်ဆီ အဓိကတင်ပို့နေပြီး ပဲတီစိမ်းကိုတော့ တရုတ်ကို အဓိက တင်ပို့နေတာဖြစ် ပါတယ်။
မြန်မာနိုင်ငံရဲ့ ပြည်ပပို့ကုန်တွေမှာ လယ်ယာထွက်ကုန်ပစ္စည်းတွေဖြစ်တဲ့ ဆန်၊ ဆန်ကွဲ၊ ပဲမျိုးစုံ၊ ပြောင်းနဲ့ နှမ်းတွေ ဟာ ပြည်ပဝင်ငွေ အဓိကရရှိနေတဲ့ ပစ္စည်းတွေ ဖြစ်ပါတယ်။ မြန်မာနိုင်ငံအတွင်း စိုက်ပျိုးတဲ့ ပဲအမျိုးအစားတွေက မြေပဲ၊ ကုလားပဲ၊ စားတော်ပဲ၊ ပဲတီစိမ်း၊ မတ်ပဲ၊ ထောပတ်ပဲ၊ ပဲစင်းငုံ၊ ပဲလွမ်းဖြူ၊ ဗိုလ်ကိတ်၊ ပဲပုပ်၊ ပဲကြီး၊ ပဲပိစပ်တို့ ဖြစ်ပါတယ်။ ပြည်တွင်းပဲစိုက်ပျိုးမှုအနေနဲ့ ၂၀၂၄-၂၀၂၅ ဘဏ္ဍာနှစ်မှာ မတ်ပဲ စိုက်ဧက ၇ သောင်းကျော် ပိုမို စိုက်ပျိုးထားပြီး အရင်နှစ်ထက် တန်ချိန် ၆ သောင်းကျော် ပိုမိုထွက်ရှိမယ်လို့ ခန့်မှန်းထားပါတယ်။
