ငလျင်လှုပ်ခတ်ပြီးနောက် မန္တလေးမြို့မှာ ရှာဖွေကယ်ဆယ်ရေးလုပ်ငန်းတွေ ကူညီဆောင်ရွက်ပေးဖို့အတွက် အိန္ဒိယနိုင်ငံက ရှာဖွေကယ်ဆယ်ရေး အဖွဲ့တွေ မတ်လ ၃၀ ရက်၊ ညနေပိုင်းက မန္တလေးမြို့ကို ရောက်ရှိခဲ့ပါတယ်။
အဲဒီ အဖွဲ့မှာ ရှာဖွေကယ်ဆယ်ရေးအဖွဲ့ဝင် အယောက်(၈၀)နဲ့ အိန္ဒိယတပ်မတော်က အယောက် (၂၀) ပါဝင်တယ်လို့ သိရပါတယ်။
အခုရောက်ရှိလာတဲ့အဖွဲ့ကို မန္တလေး အပြည်ပြည်ဆိုင်ရာ လေဆိပ်မှာ မန္တလေးတိုင်းဒေသကြီး အစိုးရအဖွဲ့က တာဝန်ရှိသူတွေ မြန်မာနိုင်ငံဆိုင်ရာ အိန္ဒိယသံရုံး ဒုတိယအကြီးအကဲ နဲ့ မန္တလေးမြို အခြေစိုက် အိန္ဒိယကောင်စစ်ဝန်ချုပ်ရုံးက ကောင်စစ်ဝန်ချုပ်နဲ့ တာဝန်ရှိသူတွေ လာရောက်ကြိုဆိုခဲ့ပါတယ်။
အဲဒီအဖွဲ့ဟာ မန္တလေးမြို့မှာ ရှာဖွေကယ်ဆယ်ရေး လုပ်ငန်းတွေ ဆောင်ရွက်သွားမှာ ဖြစ်ပြီးတော့ ရှာဖွေကယ်ဆယ်ရေး လုပ်ငန်းတွေမှာ အသုံးပြုမယ့်ပစ္စည်း တွေ အစုံအလင် ပါဝင်လာတာကိုလည်း တွေ့ရပါတယ်။
ဒါ့အပြင် တရုတ်နိုင်ငံ ဟူနန်ပြည်နယ်က ယွဲလု Blue Sky Rescue အဖွဲ့ကလည်း မန္တလေးမြို့မှာ ကူညီကယ်ဆယ်ရေး လုပ်ငန်းတွေ စတင် ဆောင်ရွက်နေပြီး မတ်လ ၃၀ ရက်၊ မနက်ပိုင်းက မန္တလေး ဗုဒ္ဓကျောင်းတိုက်တစ်ခုမှာ အသက်ရှင် ကျန်ရစ်သူ တစ်ယောက်ကို ကယ်ဆယ်နိုင်ခဲ့တယ်လို့ မြန်မာနိုင်ငံဆိုင်ရာ တရုတ်သံရုံးက ထုတ်ပြန်ပါတယ်။
မတ်လ၂၈ ရက်၊ နေ့လယ် ၁၂နာရီ၅၁မိနစ်လောက်က မန္တလေးမြို့ရဲ့ အရှေ့မြောက်ဘက် ၂၀ ကီလိုမီတာခန့်အကွာ အနက်၁၀ကီလိုမီတာကို ဗဟိုပြုပြီး အင်အား ရစ်ခ်တာစကေး ၇ဒသမ၇ရှိ အင်အားအလွန်ပြင်းထန်တဲ့ မြေငလျင် တစ်ခု လှုပ်ခတ်ခဲ့တာပါ။
