မြန်မာနိုင်ငံမှာ ငလျင်ဘေးအန္တရာယ်ဖြစ်ပွားပြီးနောက် အချိန်မီ အရေးပေါ် ကူညီဖို့ တရုတ်နိုင်ငံ ယူနန်ပြည်နယ်က ကယ်ဆယ်ရေးဆေးကုသမှုအဖွဲ့ဝင် ၃၇ ယောက်ဟာ မတ်လ ၂၉ ရက်၊ မနက် ၇ နာရီကျော်အချိန်က ရန်ကုန် အပြည်ပြည်ဆိုင်ရာလေဆိပ်ကို ရောက်ရှိလာတယ်လို မြန်မာနိုင်ငံဆိုင်ရာ တရုတ်သံရုံးက ထုတ်ပြန်ပါတယ်။
အဲဒီအဖွဲ့ဟာ ငလျင်ဖြစ်ပြီး ၁၈ နာရီအတွင်း မြန်မာနိုင်ငံသို ပထမဆုံးရောက်ရှိလာတဲ့ အပြည်ပြည်ဆိုင်ရာ ကယ်ဆယ်ရေးအဖွဲ့ဖြစ်ပြီး တရုတ်-မြန်မာ အစဉ်အလာ ဆွေမျိုးပေါက်ဖော်ချစ်ကြည်ရေးနဲ့ အေးအတူပူအမျှ အသိုက်အဝန်းစိတ်ဓာတ်ကို ပြသတာ ဖြစ်တယ်လို့ ဆိုပါတယ်။ ကယ်ဆယ်ရေးအဖွဲ့အနေနဲ့ ပျက်စီးဆုံးရှုံးမှုများတဲ့ နေပြည်တော်ကို အမြန်သွားရောက်ကာ ကယ်ဆယ်ရေး လုပ်ငန်းတွေမှာ ပါဝင်ဆောင်ရွက်မှာ ဖြစ်ပါတယ်။
ရောက်ရှိလာတဲ့ ယူနန်ကယ်ဆယ်ရေးအဖွဲ့ကို မြန်မာနိုင်ငံဆိုင်ရာ တရုတ်သံရုံး သံရုံးယာယီတာဝန်ခံ Ms. Cao Jing နဲ့ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်းတို့က လေဆိပ်မှာ ကြိုဆိုခဲ့ကြပါတယ်။
တရုတ်နိုင်ငံအနေနဲ့ မြန်မာနိုင်ငံရှိ သဘာဝဘေးဒဏ်သင့်ဒေသတွေကို အရေးပေါ် လူသားချင်းစာနာထောက်ထား မှုဆိုင်ရာ အကူအညီတွေနဲ့ ပံ့ပိုးကူညီမှုတွေကို မြန်မာရဲ့လိုအပ်ချက်နဲ့အညီ အတတ်နိုင်ဆုံး ပံ့ပိုးပေးဖို့နဲ့ မြန်မာနိုင်ငံ ပြည်သူတွေကို ကယ်ဆယ်ကာ အခက်အခဲတွေ ကျော်လွှားနိုင်ဖို့အတွက် ကူညီပေးဖို့ ဆန္ဒရှိတယ်လို့လည်း တရုတ် နိုင်ငံဘက်က ပြောကြားထားပါတယ်။
