ငလျင်ကြောင့် ပြိုကျခဲ့ရတဲ့ မန္တလေးမြို့ အောင်မြေသာစံမြိုနယ်ရှိ Sky Villa အဆောက်အဦကနေ မတ်လ ၃၁ ရက်၊ မနက်ပိုင်းက အသက် ၅ နှစ်အရွယ် ကလေး ၁ ယောက်နဲ့ ကိုယ်ဝန်ဆောင် အမျိုးသမီး ၁ ယောက် အပါအဝင် သုံးယောက်ကို ထပ်မံကယ်တင်နိုင်ခဲ့တယ်လို့ သိရပါတယ်။ ကယ်ထုတ်ချိန်မှာ ကလေးရဲ့ အသက်ရှင်လက္ခဏာ တွေက ကောင်းမွန်ခဲ့ပြီး ဆေးရုံကို ပို့ဆောင်ကုသပေးခဲ့ပါတယ်။
မတ်လ ၃၁ ရက် ၊ နေ့လယ်ပိုင်းအထိ သေဆုံးသူ ၁၂ ယောက် ၊ အသက်ရှင် ကျန်ရစ်သူ ၅၂ ယောက် ကယ်ဆယ် ထားနိုင်ပြီး ရှာဖွေကယ်ဆယ်ရေးလုပ်ငန်းတွေ ဆက်လက်ဆောင်ရွက်နေတယ်လို့ မြန်မာနိုင်ငံ မီးသတ်တပ်ဖွဲ့ ကနေ သိရပါတယ်။
ကူညီရှာဖွေရေးလုပ်ငန်းတွေ လုပ်ဆောင်နေတဲ့အခြေအနေတွေကို မြေပြင်မှာ သတင်းသွားရောက်ရယူနေတဲ့ one news ရဲ့သတင်းထောက် ကိုဝေယံထက်ဝင်းက ပြောပြသွားမှာပါ။
ရှာဖွေကယ်ဆယ်ရေး လုပ်ငန်းတွေကိုတော့ တရုတ်ကယ်ဆယ်ရေးအဖွဲ့၊ တရုတ် Ramunion Rescue ကယ်ဆယ် ရေး အဖွဲ့တွေနဲ့ မြန်မာနိုင်ငံက မီးသတ်တပ်ဖွဲ့တွေ အပါအဝင် ကယ်ဆယ်ရေး အဖွဲ့တွေ ပူးပေါင်းလုပ်ဆောင်နေ ကြပါတယ်။
Sky Villa အဆောက်အဦ ပြိုကျမှုမှာ ပိတ်မိနေသူတွေရဲ့ အသံတုံ့ပြန်ချက်ကို ယူပြီး ရှာဖွေကယ်ဆယ်ရေးလုပ်ငန်း တွေ ဆောင်ရွက်နေတယ်လို့လည်း မြန်မာနိုင်ငံ မီးသတ်တပ်ဖွဲ့ တာဝန်ရှိသူတစ်ယောက်က ပြောပါတယ်။
အမြင့် ၁၁ ထပ်ရှိတဲ့ Sky Villa အဆောက်အဦဟာ ငလျင်ကြောင့် တိုက်ခန်းအချို့ မြေကြီးအောက်ကျွံဝင်ခဲ့ပြီး ခုနစ်ထပ်သာကျန်ရှိတော့တယ်လို့ မန္တလေးမြို့ခံတွေက ပြောပါတယ်။
အလားတူ မတ်လ ၃၁ ရက်၊ မနက်ပိုင်းကလည်း မန္တလေးမြို့ ဂရိတ်ဝေါဟိုတယ် (Great Wall Hotel)မှာ ပိတ်မိနေတဲ့ အမျိုးသမီးတစ်ယောက်ကို တရုတ်ကယ်ဆယ်ရေးအဖွဲ့က ကယ်တင်နိုင်ခဲ့တယ်လို့ သိပါတယ်။
