ငလျင်ဒဏ်ကြောင့် ထိခိုက်ပျက်စီးဆုံးရှုံးမှု များပြားခဲ့ရတဲ့ မန္တလေးတိုင်းဒေသကြီးမှာ ရှာဖွေကူညီကယ်ဆယ်ရေး လုပ်ငန်တွေ အမြန်ဆုံး ဆောင်ရွက်ပေးသွားဖို့ နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က မှာကြားပါတယ်။
နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်ဟာ အဖွဲ့ဝင်တွေ လိုက်ပါပြီး မတ်လ ၂၉ ရက်၊ မနက်အစောပိုင်းက ထိခိုက်ပျက်စီးဆုံးရှုံးမှု များပြားခဲ့ရတဲ့ မန္တလေးတိုင်းဒေသကြီးကို သွားရောက်ပြီး ငလျင်ဒဏ်ကြောင့် ထိခိုက်ပျက်စီးဆုံးရှုံးခဲ့ရမှုတွေကို ရဟတ်ယာဉ်တွေနဲ့ ဦးစွာ ကြည့်ရှုစစ်ဆေးပါ တယ်။
အဲဒီနောက် အလယ်ပိုင်းတိုင်းစစ်ဌာနချုပ် အစည်းအဝေးခန်းမမှာ မန္တလေးတိုင်းဒေသကြီးဝန်ကြီးချုပ် ဦးမျိုးအောင်၊ အလယ်ပိုင်းတိုင်းစစ်ဌာနချုပ်တိုင်းမှူးနဲ့တာဝန်ရှိသူတွေက မန္တလေးတိုင်းဒေသကြီးအတွင်း ငလျင် ဒဏ်ကြောင့် ထိခိုက်ပျက်စီးဆုံးရှုံးခဲ့ရမှုတွေကို တင်ပြရာ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ နိုင်ငံတော် ဝန်ကြီးချုပ်က ရှာဖွေကူညီကယ်ဆယ်ရေးလုပ်ငန်းတွေနဲ့ ပတ်သက်ပြီး အမြန်ဆုံးဆောင်ရွက်ပေးသွားဖို့နဲ့ အခြား လိုအပ်တာတွေကို လမ်းညွှန်မှာကြားခဲ့ပြီး မန္တလေးမြို့အတွင်း ထိခိုက်ပျက်စီးဆုံးရှုံးခဲ့မှု အခြေအနေတွေကို ဆက်လက် လိုက်လံကြည့်ရှုစစ်ဆေးသွားမှာ ဖြစ်တယ်လို့ သိရပါတယ်။
မန္တလေးတိုင်းဒေသကြီးအတွင်းမှာ လက်ရှိအချိန်အထိ နောက်ဆုံးကောက်ယူရရှိတဲ့ စာရင်းတွေအရ ငလျင် ဒဏ်ကြောင့် သေဆုံးခဲ့ရသူ ၆၉၄ ယောက်၊ ဒဏ်ရာရရှိသူ ၁၆၇၀ ၊ ပျောက်ဆုံးနေသူ ၆၈ ယောက်ရှိပြီး အသေးစိတ်စာရင်းကို ဆက်လက်ကောက်ယူနေတယ်လို့ သိရပါတယ်။
