အင်အားပြင်းငလျင်ဒဏ်ခံခဲ့ရတဲ့ မန္တလေးမြို့မှာ ပျက်စီးဆုံးရှုံးမှု များပြားတယ်လို့ မန္တလေးဒေသခံတွေရဲ့ ပြောကြားချက်အရ သိရပါတယ်။ မတ်လ၂၈ ရက်၊ နေ့လယ် ၁၂ နာရီ ၅၁ မိနစ်အချိန်လောက်က မန္တလေးမြို့ရဲ့ အရှေ့မြောက်ဘက် ၂၀ ကီလိုမီတာခန့်အကွာ အနက် ၁၀ ကီလိုမီတာကို ဗဟိုပြုပြီး အင်အားရစ်ခ်တာစကေး ၇ ဒသမ၇ ရှိ အင်အားပြင်းငလျင်တစ်ခု လှုပ်ခတ်ခဲ့တာပါ။
အဲဒီငလျင်ကြောင့် မန္တလေးမြို့မှာရှိတဲ့ အထပ်မြင့် အဆောက်အအုံတွေနဲ့ နေအိမ်တိုက်တာတချို့ ပြိုကျအက်ကွဲ ပျက်စီးသွားတာကိုလည်း တွေ့ရပါတယ်။
မန္တလေးမြို့က အထပ်မြင့် အဆောက်အအုံတွေနဲ့ နေအိမ်တိုက်တာတချို့ ပြိုကျပျက်စီးသွားတဲ့အခြေအနေတွေနဲ့ ပတ်သက်လို့ မြေပြင်မှာသတင်းသွားရောက်ရယူနေတဲ့ one news ရဲ့သတင်းထောက် ကိုဝေယံထက်ဝင်းက ပြောပြသွားမှာပါ။
ဒါ့အပြင် ဘုရားစေတီတချို့နဲ့ သာသနိကအဆောက်အဦတချို့လည်း ပြိုကျပျက်စီးသွားပါတယ်။ အဲဒီအခြေအနေ တွေနဲ့ပတ်သက်လို့လည်း မန္တလေးမြို့၊ပြည်ကြီးတံခွန်မြို့နယ်မှာ ရောက်ရှိနေတဲ့ one news ရဲ့ သတင်းထောက် ကိုဝေယံထက်ဝင်းက ပြောပြသွားမှာပါ။
မန္တလေးဒေသခံ အများစုကတော့ ညဘက်တွေမှာ အိမ်တွေပေါ်မှာ မအိပ်ရဲတော့ဘဲ အိမ်ရှေ့လမ်းမပေါ်ထွက်ပြီး အိပ်စက်ကြတာကိုလည်း တွေ့ရပါတယ်။ မန္တလေးမြို့နဲ့အနီးတစ်ဝိုက်မှာ လျှပ်စစ်မီးနဲ့ ရေလည်း ပြတ်တောက်နေ ပြီး ဖုန်းဆက်သွယ်ရေးလိုင်းတွေ၊ အင်တာနက်လိုင်းတွေလည်း ရတစ်ချက်၊ မရတစ်ချက် ဖြစ်နေတယ်လို့ ဒေသခံ တွေရဲ့ ပြောကြားချက်အရ သိရပါတယ်။
စားသောက်ကုန်ဈေးနှုန်းတွေလည်း အနည်းငယ်မြင့်တက်နေသလို စက်သုံးဆီကတော့ ဆိုင်ကြီးတွေမှာ ပုံမှန် ဈေးနှုန်းနဲ့ ရောင်းချပေးနေပေမယ့် တန်းစီစောင့်ဆိုင်း ဝယ်ယူနေကြရပြီး လမ်းဘေးက လက်လီအရောင်းဆိုင် တွေမှာတော့ ဓာတ်ဆီတစ်လီတာကို ကျပ် ၅၀၀၀ လောက်နဲ့ ရောင်းချနေကြပါတယ်။
လက်ရှိမှာတော့ တိုင်းဒေသကြီးလုံခြုံရေးတပ်ဖွဲ့ဝင်တွေ၊ မြန်မာနိုင်ငံရဲတပ်ဖွဲ့ဝင်တွေ၊ မီးသတ်တပ်ဖွဲ့ဝင်တွေ၊ ပရဟိတအသင်းအဖွဲ့တွေနဲ့ ဒေသခံတွေပူးပေါင်းပြီး အပျက်အစီးတွေ ရှင်းလင်းတာနဲ့ ရှာဖွေကယ်ဆယ်ရေးလုပ် ငန်းတွေကို ဆောင်ရွက်နေကြပါတယ်။
