တရုတ်နိုင်ငံသမ္မတ ရှီကျင့်ဖျင်က မြန်မာနိုင်ငံမှာ မြေငလျင်လှုပ်ခတ်မှုနဲ့ပတ်သက်လို့ နိုင်ငံတော်အကြီးအကဲ ဗိုလ်ချုပ်မှူးကြီး မင်းအောင်လှိုင်ထံကို ကရုဏာသဝဏ်လွှာတစ်စောင် ပေးပို့ခဲ့တယ်လို့ သိရပါတယ်။
အဲဒီ သဝဏ်လွှာထဲမှာ သမ္မတရှီကျင့်ဖျင်က မြန်မာနိုင်ငံမှာ ပြင်းထန်တဲ့ ငလျင်ဘေးဒဏ်ကို ခံနေရတယ်လို့ သတင်းကြားသိရကြောင်း၊ ငလျင်ကြောင့် အသေအပျောက်နဲ့ စည်းစိမ်ဥစ္စာတွေ ဆုံးရှုံးမှု ကြီးမားစွာ ကြုံတွေ့ နေရတာကို တရုတ်အစိုးရနဲ့ ပြည်သူတို့ကိုယ်စား သေဆုံးသူတွေအတွက် လေးလေးနက်နက် ဝမ်းနည်းကြေကွဲ ကြောင်းနဲ့ သေဆုံးသူတွေရဲ့ မိသားစုတွေ၊ ထိခိုက်ဒဏ်ရာရရှိသူတွေနဲ့ သဘာဝဘေးသင့်ပြည်သူတွေကို အလေး အနက် ဝမ်းနည်းကြောင်း ပြောကြားလိုတယ်လို့ ဖော်ပြထားပါတယ်။
ဒါ့အပြင် တရုတ်နဲ့မြန်မာဟာ ပျော်ရွှင်ခြင်းနဲ့ ခက်ခဲခြင်းကို အတူမျှဝေကျော်လွှားနိုင်တဲ့ အေးအတူပူအမျှ နိုင်ငံတွေဖြစ်ကြပြီး နှစ်နိုင်ငံပြည်သူတွေဟာ လေးနက်တဲ့ ဆွေမျိုးပေါက်ဖော်ချစ်ကြည်ဆက်ဆံရေးရှိကြောင်း၊ တရုတ်နိုင်ငံဟာ မြန်မာနိုင်ငံအတွက် လိုအပ်တဲ့ အကူအညီတွေ ပေးအပ်ဖို့နဲ့ ပြည်သူတွေ သဘာဝဘေးဒဏ်ကို ကျော်လွှားပြီး နေအိမ်တွေ အမြန်ဆုံး ပြန်လည်တည်ဆောက်နိုင်ဖို့ ကူညီပေးသွားဖို့ ဆန္ဒရှိတယ်လို့လည်း ပြောကြားခဲ့ပါတယ်။
တရုတ်နိုင်ငံတော်ကောင်စီ ဝန်ကြီးချုပ် Mr. Li Qiang ကလည်း မြန်မာနိုင်ငံမှာ မြေငလျင်လှုပ်ခတ်မှုနဲ့ ပတ်သက် လို့ နိုင်ငံတော်အကြီးအကဲ ဗိုလ်ချုပ်မှူးကြီး မင်းအောင်လှိုင်ထံ ကရုဏာကြောင်း သဝဏ်လွှာပေးပိုခဲ့တယ်လို့ သိရပါတယ်။
တရုတ်နိုင်ငံအနေနဲ့ ငလျင်ဒဏ်သင့် မြန်မာနိုင်ငံကို ငလျင်ဘေးအန္တရာယ်ဖြစ်ပွားပြီးနောက် အချိန်မီ အရေးပေါ် ကူညီဖို့ တရုတ်နိုင်ငံ ယူနန်ပြည်နယ်က ကယ်ဆယ်ရေးဆေးကုသမှုအဖွဲ့ဝင်တွေနဲ့ Blue Sky Rescue (ယူနန်) အဖွဲ့တွေက ငလျင်ဒဏ်သင့် မြို့နယ်တွေကို သွားရောက်နေပြီဖြစ်တယ်လို့ သိရပါတယ်။
