ဩစတြေးလျနိုင်ငံ အရှေ့မြောက်ပိုင်းမှာ မိုးသည်းထန်ပြီး ဆိုးဝါးတဲ့ ရေကြီးရေလျှံမှုတွေ ရုတ်တရက်ဖြစ်ပေါ်နေ တာကြောင့် နေအိမ်တွေနဲ့ စီးပွားရေးလုပ်ငန်းတွေ ရေဖုံးလွှမ်းသွားခဲ့ပါတယ်။ ဒီအတွက် ရေဘေးသင့်ဒေသမှာ ဒေသခံတွေကို နေရပ်ရွှေ့ပြောင်းဖို့ အာဏာပိုင်တွေက ညွှန်ကြားထားရပါတယ်။
မြောက်ပိုင်းကွင်းစလန်း ပြည် နယ်ရဲ့ နေရာတော်တော်များများမှာ ပြီးခဲ့တဲ့ သောကြာနေ့ကတည်းက ရေကြီးရေလျှံမှုတွေ ဖြစ်ပွားနေပြီး တောင်း စဗီးလ်မြို့နဲ့ အင်ဂမ်မြို့တွေမှာ ရေကြီးမှု အဆိုးဆုံး ဖြစ်ပွားနေတာပါ။ ဒါကြောင့်လည်း ကမ်းရိုးတန်းအနီးမှာ နေသူတွေကို အမြန်နေရာရွှေ့ဖို့ တာဝန်ရှိသူတွေက တိုက်တွန်းထားပါတယ်။ ကွင်းစလန်းပြည်နယ်အစိုးရက ရေကြီးမှုဖြစ်စဉ်တွေအတွင်း လူတစ်ယောက် သေဆုံးခဲ့တယ်လို့ တနင်္ဂနွေနေ့မှာ အတည်ပြုထားပါတယ်။
သေဆုံးသူဟာ အမျိုးသမီးဖြစ်ပြီး သူအပါအဝင် လူ(၆)ယောက် လိုက်ပါလာတဲ့ ကယ်ဆယ်ရေးလှေဟာ သစ်ပင် တစ်ပင်ကို တိုက်မိပြီး မှောက်သွားခဲ့ရာက သေဆုံးသွားခဲ့တာပါ။ ကျန်တဲ့ (၅)ယောက်ကိုတော့ ပြန်လည် ကယ်ဆယ်ထားနိုင်တယ်လို့ ဩစတြေးလျတာဝန်ရှိသူတွေက ထုတ်ပြန်ထားပါတယ်။ တောင်းစဗီးလ်မြို့မှာ ရေအတက်မြန်နေတာကြောင့် အသက်အန္တရာယ်အတွက် စိုးရိမ်ရတဲ့ အခြေအနေထိ ရောက်ရှိလာနေတယ်လို့ ဒေသန္တရအာဏာပိုင်တွေက သတိပေးထားပြီး အရေးပေါ် သတိပေးချက် တစ်ရပ်လည်း ထုတ်ပြန်ထားပါတယ်။ ဩစတြေးလျဝန်ကြီးချုပ် အယ်လ်ဘားနိစ်က ရေဘေးနဲ့ ရင်ဆိုင်နေရတဲ့ ဒေသဆီ လိုအပ်တဲ့ အကူအညီမှန်သမျှ ဖယ်ဒရယ် အစိုးရက ပေးအပ်သွားမယ်လို့ ပြောဆိုထားပါတယ်။
