ထိုင်းနိုင်ငံ ဘန်ကောက်မြို့မှာ ၂၀၂၅ ခုနှစ် မဟာ သင်္ကြန်ပွဲတော်ကြီးကို ဧပြီလ ၁၁ ရက်နေ့ကနေ ၁၅ ရက် အထိ ၅ ရက်တိုင်တိုင် စည်ကားသိုက်မြိုက်စွာကျင်းပသွားမှာဖြစ်ကြောင်း ထိုင်းအစိုးရအဖွဲ့ကပြောပါတယ်။ဘန်ကောက်မြို့ Sanam Luang ကွင်းမှာ ဗဟိုပြုကျင်းပမယ့် မဟာသင်္ကြန် ဆုန်ခရန် သင်္ကြန်ပွဲတော်ကြီးအတွက် အစိုးရအဖွဲ့က ဘတ်ငွေ ၁၅၃ သန်း အထိ အသုံးပြုဖို့ လျာထားတယ်လို့သိရပါတယ်။
ကြီးမားတဲ့ အခမ်းအနားနဲ့အတူ Sanan Luang မှာကျင်းပပြုလုပ်မယ့် သင်္ကြန်ပွဲတော်အတွင်း ခရီးသွား ၈၀၀,၀၀၀ နီးပါးလာရောက်မယ်လို့ခန့်မှန်းထားပြီး ဝင်ငွေ ဘတ် ၃.၂ ဘီလီယံ အထိ ရရှိမယ်လို့ လည်း ထိုင်းအစိုးရအဖွဲ့က မျှော်မှန်းထားပါတယ်။ဧပြီလ ၁၁ ရက်ကနေ ၁၅ ရက်အထိ ကျင်းပဖို့ စီစဉ်ထားတဲ့ ထိုင်းသင်္ကြန်ပွဲတော်ကနေ ရိုးရာသင်္ကြန်ပွဲတော် အငွေ့အအသက်တွေ ရရှိစေဖို့အပြင် သမိုင်းဝင် ယဉ်ကျေးမှု တွေကို လေ့လာနိုင်ဖို့အတွက် ရည်ရွယ်ပြီး ပွဲတော်ကျင်းပဖို့ရည်ရွယ်ထားတာဖြစ်ကြောင်း ထိုင်းနိုင်ငံ ခရီးသွားလုပ်ငန်းနှင့် အားကစားဝန်ကြီးဌာနကပြောကြားထားပါတယ်။
“မဟာသင်္ကြန်ပွဲတော်ကို ဂုဏ်ပြုခြင်း” ဆိုတဲ့ ဆောင်ပုဒ်ဖြင့် အခမ်းအနားအတွင်း ချီတက်ပွဲတွေ၊ ယဉ်ကျေးမှု ဖျော်ဖြေပွဲတွေ ၊ ရေကစားရမယ့်နေရာတွေ၊ ၊ ထိုင်းနိုင်ငံရဲ့ ရိုးရာဓလေ့တွေ၊ ကုသိုလ်ကောင်းမှုပြုလုပ်မယ့် အခမ်းအနားတွေ အပါအဝင် အမျိုးမျိုးသော လှုပ်ရှားမှုများ စွာ ပါဝင်မှာဖြစ်ကြောင်း ထိုင်းအစိုးရအဖွဲ့ကပြောကြားထားပါတယ်။
