အမေရိကန်နိုင်ငံက ပြည်နှင်တဲ့ မြန်မာနိုင်ငံသား နှစ်ယောက်ကို ပြန်လည်လက်ခံသွားမှာ ဖြစ်တယ်လို့ နိုင်ငံခြား ရေးဝန်ကြီးဌာနက မတ်လ ၂၁ ရက်မှာ ထုတ်ပြန်ပါတယ်။ ပြည်နှင်ခံရသူ ပထမအသုတ်အဖြစ် မြန်မာနိုင်ငံသား နှစ်ယောက်ဟာ မတ်လ ၁၉ ရက်နဲ့ ၂၈ ရက်နေ့တွေမှာ လေကြောင်းခရီးနဲ့ မြန်မာနိုင်ငံကို သီးခြားစီ ရောက်ရှိမှာ ဖြစ်ပြီး သူတို့ကို တာဝန်ရှိသူတွေက ကြိုဆိုစောင့်ရှောက် ပံ့ပိုးတာတွေ ဆောင်ရွက်ပေးသွားမှာ ဖြစ်တယ်လို့ ဆိုပါတယ်။
ကမ္ဘာ့နိုင်ငံတွေအနေနဲ့ သက်ဆိုင်ရာနိုင်ငံရဲ့ အကျိုးစီးပွားကို ထိပါးသူ ဒါမှမဟုတ် ရာဇဝတ်မှုတွေ ကျူးလွန်ထားသူ တရားမဝင် ရွှေ့ပြောင်းရောက်ရှိသူ နိုင်ငံခြားသားတွေကို ဥပဒေကြောင်းအရ ပြည်နှင်တာတွေကို ပြုလုပ်လေ့ ရှိ တယ်လို့ ထုတ်ပြန်ချက်မှာ ဖော်ပြထားပါတယ်။အလား တူ အမေရိကန်အစိုးရသစ်ရဲ့ ဦးစားပေး မူဝါဒတွေအရ လူဝင်မှုကြီးကြပ်ရေး စည်းမျဉ်းစည်းကမ်းတွေနဲ့ ငြိ စွန်းသူတွေ၊ ပြစ်မှုကျူးလွန်ထားတဲ့ နိုင်ငံခြားသားတွေကို ပြည်နှင်တာတွေ ပြုလုပ်နေတယ်လို့လည်း ထုတ်ပြန် ချက်အရ သိရပါတယ်။
အဲဒါကြောင့် နိုင်ငံသားတွေအနေနဲ့ ပြည်ပကို တရားဝင် လမ်းကြောင်းကနေ ထွက်ခွာကြဖို့၊ ရောက်ရှိရာ နိုင်ငံတွေ မှာ သက်ဆိုင်ရာ ပြည်တွင်း ဥပဒေတွေကို လိုက်နာကြဖို့နဲ့ အမိနိုင်ငံအတွင်းမှာ ဥပဒေဘောင်အတွင်း နေထိုင်မှုဟာ အကောင်းဆုံး ဖြစ်တယ်လို့လည်း ထုတ်ပြန်ချက်မှာ ပါရှိပါတယ်။အမေရိကန်နိုင်ငံရောက် မြန်မာနိုင်ငံသားတွေအနေနဲ့ တရားဝင်အထောက်အထားတွေနဲ့ နေထိုင်ခွင့်ရရှိရေး ကြိုတင်ဆောင်ရွက်ဖို့ ဝါရှင်တန်မြို့ မြန်မာသံရုံးက ဖေဖော်ဝါရီ ၅ ရက် ရက်စွဲနဲ့ အသိပေး ကြေညာထားသလို အမေရိ ကန်အစိုးရက နေရပ်ပြန်ပို့မယ့် လူပေါင်း ၁ ဒသမ ၄ သန်းကျော်ထဲမှာ မြန်မာနိုင်ငံသား ၆၇၉ ယောက် ပါဝင်နေတယ်လို့လည်း အမေရိကန် လူဝင်မှု ကြီးကြပ်ရေးနှင့် အကောက်ခွန်ဌာနက ထုတ်ပြန်ထားတဲ့ အချက်အလက်တွေမှာ ဖော်ပြထားပါတယ်။
