မလေးရှားနိုင်ငံမှာ ၂၀၂၄ ခုနှစ် မတ်လ ၁၄ ရက်ကနေ ၂၀၂၅ ခုနှစ် မတ်လ ၁၈ ရက်အထိ ယာဉ်မတော်တဆမှု ကြောင့် ၂ နာရီမှာ လူ ၁ ယောက်နှုန်း သေဆုံးနေတယ်လို့ တရားဝင် စာရင်းဇယားတွေကိုကိုးကားပြီး The Straits Times သတင်းမှာ ဖော်ပြထားပါတယ်။ ဒါ့အပြင် စက္ကန့် ၅၀ တိုင်းမှာ ယာဉ်မတော်တဆမှုတစ်ခု ဖြစ်ပွားနေတယ် လို့လည်း စာရင်းတွေအရ သိရပါတယ်။
မလေးရှားနိုင်ငံမှာ ဟရီရာရ အားလပ်ရက်ရာသီ နီးကပ်လာရင် သန်းနဲ့ချီ တဲ့ ပြည်သူတွေဟာ သူတို့ရဲ့ဇာတိမြို့တွေကို ခရီးသွားတဲ့အတွက် အဲဒီအချိန်ကာလမှာ ယာဉ်မတော်တဆမှုတွေ အဖြစ်များလေ့ ရှိပါတယ်။ ယာဉ်ကြောပိတ်ဆို့မှုနဲ့ လမ်းအန္တရာယ် ကင်းရှင်းရေးဆိုင်ရာ ကက်ဘိနက်ကော်မတီရဲ့ဖော်ပြလာတဲ့ ကိန်းဂဏန်း တွေအရ မတော်တဆမှု အရေအတွက်ဟာ အဓိက ပွဲတော်တွေကျင်းပရာ နေ့ရက်တွေမှာ သိသိသာသာ မြင့်တက် လာတတ်ပြီး ပွဲတော်ကာလအတွင်းတော့ ကျဆင်းသွားတတ်ပါတယ်။
ပွဲတော်ပြီးဆုံးတာနဲ့ ယာဉ်ကြောပိတ်ဆို့မှု တွေနဲ့အတူ မတော်တဆမှုတွေ ပုံမှန်ပြန်လည် မြင့်တက်လာတာကို တွေ့ရပါတယ်။ကိန်းဂဏန်းတွေအရ ၂၀၂၄ ခုနှစ်ရဲ့ယာဉ်တိုက်မှု အများဆုံးဖြစ်ပွားတဲ့ သုံးရက်ဟာ ဧပြီ ၄ ရက်၊ ၅ ရက်နဲ့ ၆ ရက် ဖြစ်ပြီး ဧပြီ ၄ ရက်မှာ ယာဉ်မတော်တဆမှု ၂,၁၆၀ ခု၊ ဧပြီ ၅ ရက်မှာ ၂,၁၈၅ ခုနဲ့ ဧပြီ ၆ ရက်မှာ ၂,၁၅၆ ခု ဖြစ်ပွားခဲ့ပါတယ်။
