စင်ကာပူနိုင်ငံသား မြန်မာအမျိုးသမီးတစ်ဦးရဲ့ ဘဏ်အကောင့်ထဲကို အမေရိကန် ဒေါ်လာ ၇၁၁ သန်းကျော် တရားမဝင်ရောက်ရှိလာမှုကြောင့် တရားရင်ဆိုင်ရမှာဖြစ်တယ်လို့ The Straits Times သတင်းမှာ ဖော်ပြထားပါတယ်။အသက် (၅၈) နှစ်အရွယ် မြန်မာအမျိုးသမီးတစ်ဦးဟာ ခင်ပွန်းဖြစ်သူရဲ့ ငယ်သူငယ်ချင်းဖြစ်သူ မြန်မာနိုင်ငံ သား အမျိုးသားတစ်ဦးနဲ့ စင်ကာပူနိုင်ငံမှာ လိုင်စင်မရှိဘဲ ငွေပေးချေမှု ဝန်ဆောင်မှုပေးတဲ့လုပ်ငန်းကို လုပ်ကိုင် နေတာဖြစ်ပြီး အဲ့ဒီ တရားမဝင်လုပ်ငန်းကြောင့် မတ်လ ၅ ရက်က အပြစ်ရှိကြောင်း ၀န်ခံခဲ့တယ်လို့ ဆိုပါတယ်။
သူမရဲ့ ကော်ပိုရိတ်ဘဏ်အကောင့်သုံးခုထဲကို ဒေါ်လာသန်းရာနဲ့ချီ တန်ဖိုးရှိတဲ့ ငွေကြေးတွေ ဘယ်ကရောက်ရှိ လာလဲဆိုတာ မသိဘူးလို့ တရားရုံးမှာဝန်ခံခဲ့တယ်လို့ သိရပါတယ်။ယူနီဝမ်း(Unione)လို့ခေါ်တဲ့ လက်ကားရောင်းဝယ်ရေးကုမ္ပဏီတစ်ခုကို ပေါင်းစည်းပြီး ကော်ပိုရိတ်ဘဏ်အကောင့်သုံးခုကို ဖွင့်လှစ်ပြီးနောက် သူမဘဏ်အကောင့်ထဲကို ကော်မရှင်ခ စုစုပေါင်းဒေါ်လာ ၁၇၀,၀၀၀ ကျော်ရရှိခဲ့တယ်လို့ ဆိုပါတယ်။ဒါ့အပြင် သူမနဲ့အတူ တွဲလုပ်ခဲ့တဲ့ စင်ကာပူနိုင်ငံမှာ အမြဲတမ်းနေထိုင်သူဖြစ်တဲ့ အသက် ၆၀ အရွယ်ရှိ အမျိုးသားတစ်ဦးဟာလည်း ကော်မရှင်ခ ဒေါ်လာ ၁၁၀,၀၀၀ ကျော် ရရှိခဲ့ပြီး အလားတူစွဲချက်တွေအတွက် အပြစ်ရှိကြောင်း အစောပိုင်းကတည်းက ဝန်ခံခဲ့လို့ အဆိုပါအမျိုးသားကို လာမယ့် ဧပြီလ ၂၄ ရက်နေ့မှာ စီရင်ချက်ချမှတ်မယ်လို့ သိရပါတယ်။
၂၀၂၀ ပြည့်နှစ်ကလည်း အဆိုပါအမျိုးသားဟာ ငွေမလွှဲမီ ဒေါ်လာ ၁၅၀ ကျော်ရရှိဖို့အတွက် ယူနီဝမ်း(Unione) ဘဏ် အကောင့်တစ်ခုကို အသုံးပြုခဲ့တယ်လို့ သိရပါတယ်။၂၀၂၀ ပြည့်နှစ် ဇူလိုင်လ ၂၁ ရက်နေ့မှာ ဘဏ်က သံသယ ဖြစ်ဖွယ် အရောင်းအဝယ်အများအပြားကြောင့် ဘဏ်အကောင့်ကိုပိတ်သိမ်းခဲ့တယ်လို့ သိရပါတယ်။အကောင့်ပိတ်ပြီးနောက် တရားရင်ဆိုင်ရမယ့်အမျိုးသမီးက အဆိုပါအမျိုးသားဆီကနေ ညွှန်ကြားချက်အများအပြား ရယူပြီး အခြားဘဏ် တစ်ခုနဲ့ ပေါင်းစည်းထားတဲ့ အကောင့်တစ်ခုကို ဖွင့်လှစ်ခဲ့တာဖြစ်တယ်လို့ သိရပါတယ်။
