မိုင်ယာမီအိုးပင်း စတုတ္ထအဆင့်ပွဲစဉ်တွေမှာ အိမ်ရှင်အမေရိကန်နိုင်ငံရဲ့ တင်းနစ်မယ်တွေ ရလဒ်ဆိုးခဲ့ပြီး ပြိုင်ပွဲ ကနေ ထွက်ခဲ့ရာမှာ ဆီဒင်အဆင့် ၃ ရထားတဲ့ တင်းနစ်မယ် ကိုကိုဂတ်ဖ်လည်း ပါဝင်သွားခဲ့ပါတယ်။
ကိုကိုဂတ်ဖ် ဟာ စတုတ္ထအဆင့်မှာ ပိုလန်တင်းနစ်မယ် လင်နက်တီနဲ့ ယှဉ်ပြိုင်ခဲ့ရတာဖြစ်ပြီး ရှေ့မှာ ယှဉ်ပြိုင်ခဲ့တဲ့ပွဲတွေမှာ အမေရိကန်တင်းနစ်မယ်တွေ ရလဒ်ဆိုးထားခဲ့လို့ အခုပွဲမှာ ကိုကိုဂတ်ဖ်ကို အားလုံးက မျှော်လင့်ထားခဲ့ကြတာ ဖြစ်ပါတယ်။ ဒါပေမဲ့လည်း ပထမပွဲလတ်မှာ ထင်မှတ်မထားဘဲ ရှုံးနိမ့်မှုနဲ့အတူ ကိုကိုဂတ်ဖ် ဖိအားများခဲ့ရပြီး ဒုတိယပွဲလတ်မှာ ပုံမှန်လက်စွမ်းပြနိုင်ဖို့ကို ရုန်းကန်သွားခဲ့ရပါတယ်။ ပွဲကစားချိန် (၁)နာရီနဲ့ (၂၉)မိနစ်သာ ကြာမြင့်ခဲ့ပြီးနောက် လင်နက်တီက (၆း၄၊၆း၄)ဆိုတဲ့ရလဒ်နဲ့ အနိုင်ရခဲ့ပြီး ကွာတားဖိုင်နယ်အဆင့်ကို တက်သွား ခဲ့တာ ဖြစ်ပါတယ်။
ဒါ့ကြောင့် စတုတ္ထအဆင့်မှာ အမေရိကန်တင်းနစ်မယ်တွေဖြစ်ကြတဲ့ လက်ရှိချန်ပီယံ ကောလင်းစ်၊ ကရူဂါ၊ အန်နက်စီမိုဗာနဲ့ ကိုကိုဂတ်ဖ်တို့ ပြိုင်ပွဲကနေ ထွက်လိုက်ရပြီး ပီဂူလာတစ်ဦးတည်းသာ ကွာတားဖိုင်နယ်ကို တက်ရောက်နိုင်ခဲ့တဲ့ အမေရိကန်တင်းနစ်မယ် ဖြစ်ခဲ့ရပါတယ်။ ကိုကိုဂတ်ဖ်ကို အနိုင်ရခဲ့တဲ့ လင်နက်တီကတော့ ကွာတားဖိုင်နယ်မှာ အီတလီတင်းနစ်မယ် ပါအိုလီနီနဲ့ ရင်ဆိုင်ရမှာ ဖြစ်ပါတယ်။
