ဆားဘီးယားတင်းနစ်သမား ဂျိုကိုဗစ်ဟာ မိုင်ယာမီအိုးပင်းတင်းနစ် အမျိုးသားတစ်ဦးချင်းပြိုင်ပွဲမှာ ကွာတား ဖိုင်နယ်အဆင့်ကို တက်ရောက်သွားခဲ့ပါတယ်။ ကမ္ဘာ့အဆင့် ၅ ဂျိုကိုဗစ်နဲ့ အီတလီနိုင်ငံသား မူဆက်တီတို့ ယှဉ်ပြိုင်ခဲ့တဲ့ စတုတ္ထအဆင့်ပွဲရဲ့ ပထမပွဲလတ်ကို ယှဉ်ပြိုင်နေစဉ်မှာပဲ မိုးရွာသွန်းတာကြောင့် ပွဲကို ခဏရပ်နား ခဲ့ရပြီး ရာသီဥတု တည်ငြိမ်လာတော့မှ ပြန်လည်စတင်နိုင်ခဲ့တာ ဖြစ်ပါတယ်။
ဒါပေမဲ့လည်း အသက် ၃၇ နှစ် အရွယ် ဂျိုကိုဗစ်က ပွဲကိုဆက်လက်ဦးဆောင်နိုင်ခဲ့ပြီး အသာရမှုကို ဆက်ထိန်းထားနိုင်ခဲ့ပါတယ်။ ပွဲကစားချိန် ၁ နာရီနဲ့ ၂၂ မိနစ်သာ ကြာမြင့်ခဲ့ပြီးနောက် ဂျိုကိုဗစ်က (၆း၂၊၆း၂)ဆိုတဲ့ရလဒ်နဲ့ အနိုင်ရခဲ့ပြီး ကွာတားဖိုင်နယ် အဆင့်ကို တက်ရောက်သွားခဲ့တာပါ။ ကာတာအိုးပင်းနဲ့ အင်ဒီးယန်းဝဲလ်ပြိုင်ပွဲတွေမှာ ပထမအဆင့်ကနေပဲ ထွက်ခဲ့ရတဲ့ ဂျိုကိုဗစ်ဟာ မိုင်ယာမီအိုးပင်းပြိုင်ပွဲမှာတော့ ပုံစံကောင်းကို ပြန်ရနေပြီး ကွာတားဖိုင်နယ်အဆင့်ကို တက်ရောက်လာနိုင်ခဲ့တာဖြစ်ပါတယ်။ ကွာတားဖိုင်နယ်မှာတော့ ဆီဒင်အဆင့် ၄ ရထားတဲ့ ဂျိုကိုဗစ်ဟာ ဆီဒင်အဆင့် ၂၄ ရထားတဲ့ အမေရိကန်နိုင်ငံသား ကိုဒါနဲ့ ဆက်လက်ယှဉ်ပြိုင်ရမှာ ဖြစ်ပါတယ်။
