ဗြိတိန်တင်းနစ်မယ် ရာဒူကာနူဟာ နည်းပြဖြစ်သူ ပလာတီနစ်နဲ့ စမ်းသပ်လေ့ကျင့်မှုတွေကို ၂ ပတ်အကြာမှာပဲ အဆုံးသတ်လိုက်ပါတယ်။ မိုင်ယာမီအိုးပင်း ပထမအဆင့်မှာ ပြိုင်ဘက် ဂျပန်တင်းနစ်မယ် ဆာယာကာကို အနိုင် ရပြီးနောက်မှပဲ ဒီသတင်းကို ရာဒူကာနူက အတည်ပြုသွားခဲ့တာ ဖြစ်ပါတယ်။
သတင်းတွေအရ ပလာတီနစ်ဟာ အခုလအစောပိုင်းက ယှဉ်ပြိုင်ခဲ့တဲ့ အင်ဒီးယန်းဝဲလ်ပြိုင်ပွဲ ပထမအဆင့်ပွဲ မတိုင်ခင်မှာ ကာလီဖိုးနီးယားကို ပြန်သွားခဲ့ပေမယ့် အခုမိုင်ယာမီအိုးပင်းပြိုင်ပွဲ မတိုင်ခင် ပြန်ရောက်လာခဲ့ပြီး ရာဒူကာနူနဲ့အတူ လေ့ကျင့်မှုတွေ ပြုလုပ်ခဲ့တယ်လို ဆိုပါတယ်။ နည်းပြ ပလာတီနစ်နဲ့ ဆက်ဆံရေးအခြေအနေတွေက လမ်းကြောင်းမှန်ပေါ်ကို မရောက်နိုင်ဘူးလို ခံစားမိတဲ့အတွက် အခုလိုမျိုး လက်တွဲဖြုတ်ဖို ဆုံးဖြတ်လိုက်တာဖြစ်တယ်လို ရာဒူကာနူရဲ့ ပြောရေးဆိုခွင့်ရှိသူက ပြောသွားခဲ့ပါတယ်။
အသက် ၄၉ နှစ်အရွယ် ပလာတီနစ်ဟာ နာမည်ကြီးတင်းနစ်မယ် တွေဖြစ်ကြတဲ့ ကာဆက်ကီနာနဲ့ ဆီဘူကိုဗာတိုကို နည်းပြခဲ့ဖူးသူဖြစ်ပြီး အရည်အသွေးမြင့်တဲ့ နည်းပြလို သတ်မှတ်ခံထားရတာ ဖြစ်ပါတယ်။ ရာဒူကာနူဟာ မိုင်ယာမီအိုးပင်းဒုတိယအဆင့်မှာ အမေရိကန်တင်းနစ်မယ် အမ်မာ နာဗာရိုးနဲ့ ယှဉ်ပြိုင်ရမှာ ဖြစ်ပါတယ်။
