ဗြိတိန်တင်းနစ်မယ် ရာဒူကာနူဟာ အခုနှစ်တင်းနစ်ရာသီမှာ အကောင်းဆုံးစွမ်းဆောင်မှုအဖြစ် ကမ္ဘာ့အဆင့် ၁၀ နာဗာရိုးကို အနိုင်ယူပြီး မိုင်ယာမီအိုးပင်းပြိုင်ပွဲ တတိယအဆင့်ကို တက်ရောက်နိုင်ခဲ့ပါတယ်။
ရာဒူကာနူနဲ့ နာဗာရိုးတို့ ကစားခဲ့တဲ့ ဒုတိယအဆင့်ပွဲက အကြိတ်အနယ်ရှိခဲသလို ပွဲကစားချိန်ကလည်း ၃ နာရီနီးပါး ကြာမြင့် ခဲ့ပါတယ်။ ကမ္ဘာ့အဆင့် ထိပ်ဆုံး ၁၀ ယောက်အတွင်း ရပ်တည်နေသလို အခုပြိုင်ပွဲမှာ ဆီဒင်အဆင့် ၈ သတ်မှတ် ခံထားရတဲ့ နာဗာရိုးက အကောင်းဆုံးလက်စွမ်းနဲ့ ရာဒူကာနူကို ဖိအားပေးခဲ့သလို အခုပြိုင်ပွဲမှာ လက်စွမ်းကောင်း ရနေတဲ့ ရာဒူကာနူကလည်း အကောင်းဆုံး တုံ့ပြန်ခဲ့တာပါ။ ပွဲအပြီးမှာတော့ ရာဒူကာနူက (၇း၆၊ ၂း၆၊ ၇း၆)ဆိုတဲ့ ရလဒ်နဲ့ အနိုင်ရခဲ့ပြီး တတိယအဆင့်ကို တက်ရောက်သွားနိုင်ခဲ့ပါတယ်။
ရာဒူကာနူရဲ့ ကစားသမားဘဝမှာ ကမ္ဘာ့ အဆင့်ထိပ်ဆုံး ၁၀ ယောက်အတွင်း ရပ်တည်နေတဲ့ ကစားသမားတစ်ယောက်ကို တတိယအကြိမ်မြောက် အနိုင်ရတာလည်း ဖြစ်ပါတယ်။ ကမ္ဘာ့အဆင့် ၆၀ မှာရပ်တည်နေတဲ့ ရာဒူကာနူကတော့ အခုနောက်ပိုင်းမှာ ဒီပွဲက သူမရဲ့အကောင်းဆုံးပွဲတစ်ပွဲ ဖြစ်ခဲ့ပါတယ်လို့ ပွဲအပြီးမှာ ပြောသွားခဲ့ပါတယ်။ မိုင်ယာမီ အိုးပင်း တတိယအဆင့် မှာတော့ ရာဒူကာနူဟာ အမေရိကန်တင်းနစ်မယ် ကက်ဆလာနဲ့ ဆက်လက်ရင်ဆိုင်ရမှာ ဖြစ်ပါတယ်။
