လာမယ့် ၂၀၂၆ ကမ္ဘာ့ဖလားပြိုင်ပွဲမှာ တိုက်စစ်မှူး မက်ဆီပါဝင်ကစားနိုင်ဖို့ မျှော်လင့်ထားသလို လက်ရွေးစင် အသင်းမှာ မက်ဆီအတွက် နေရာတစ်ခု ချန်ထားပေးသွားမှာဖြစ်တယ်လို့ အာဂျင်တီးနားနည်းပြ စကာလိုနီက ပြောသွားခဲ့ပါတယ်။ အသက် ၃၇ နှစ်အရွယ် မက်ဆီဟာ ဒဏ်ရာပြဿနာကြောင့် အခုမတ်လအတွင်းမှာ ကစားခဲ့တဲ့ အာဂျင်တီးနားအသင်းရဲ့ ကမ္ဘာ့ဖလားခြေစစ်ပွဲစဉ် ၂ ပွဲကို လွဲချော်ခဲ့တာဖြစ်ပါတယ်။
အခုလ ကမ္ဘာ့ဖလားခြေစစ်ပွဲတွေအပြီးမှာပဲ အာဂျင်တီးနားအသင်းဟာ ၂၀၂၆ ကမ္ဘာ့ဖလားပြိုင်ပွဲဝင်ခွင့်ရဖို့ သေချာ ခဲ့ပြီးနောက် မက်ဆီအနေနဲ့ ကမ္ဘာ့ဖလားပြိုင်ပွဲဝင် အာဂျင်တီးနားအသင်းမှာ ပါဝင်လာနိုင်မလားဆိုတာက မေးခွန်းတစ်ခုဖြစ်လာခဲ့ပါတယ်။ ၂၀၂၆ ကမ္ဘာ့ဖလားပြိုင်ပွဲအတွက် ပြောဖို့က စောနေသေးသလို လက်ရွေးစင် အသင်းနဲ့ ပတ်သက်တဲ့ ဆုံးဖြတ်ချက်အတွက် မက်ဆီကိုပဲ လွတ်လွတ်လပ်လပ် ဆုံးဖြတ်ခွင့်ပေးထားပါတယ်လို့ နည်းပြ စကာလိုနီက ပြောသွားခဲ့ပါတယ်။၂၀၂၂ ကမ္ဘာ့ဖလားပြိုင်ပွဲမှာ အာဂျင်တီးနားကို ချန်ပီယံဖြစ်အောင် ဦးဆောင်ပေးနိုင်ခဲ့ပြီးနောက်ပိုင်း မက်ဆီဟာ ဒဏ်ရာပြဿနာတွေနဲ့အတူ ရုန်းကန်နေခဲ့ရပြီး အင်တာမိုင်ယာမီ အသင်းနည်းပြ မာရှေယာနိုက မက်ဆီရဲ့ ကြံ့ခိုင်မှုအခြေအနေကို ကြည့်ပြီး ပွဲတွေမှာအသုံးပြုဖို့ကို စဉ်းစားသွား ရမှာဖြစ်တယ်လို့ ပြောထားပါတယ်။
