အယ်လီဆန် ပြန်ရောက်မည်ဟု လီဗာပူး အတည်ပြု

ကိုလံဘီယာအသင်းနဲ့ ကစားခဲ့တဲ့ပွဲမှာ ဦးခေါင်းထိခိုက်ခဲ့တဲ့ ဂိုးသမား အယ်လီဆန်ဟာ ဘရာဇီးလက်ရွေးစင် အသင်းကနေ ထွက်လာခဲ့ပြီး ကလပ်အသင်းဆီကို ပြန်ရောက်လာမှာဖြစ်တယ်လို့ လီဗာပူးအသင်းက အတည်ပြု ခဲ့ပါတယ်။

ဘရာဇီးအသင်းက ၂ ဂိုး-၁ ဂိုးနဲ့ အနိုင်ရခဲ့တဲ့ပွဲမှာ ဂိုးသမား အယ်လီဆန်ဟာ ကိုလံဘီယာနောက်ခံလူ ဆန်းချက်ဇ်နဲ့ ထိခိုက်မိခဲ့ပြီးနောက် ကွင်းအတွင်းဆေးကုသမှုခံယူခဲ့ရသလို နောက်ပိုင်းမှာ လူစားလဲတာကိုပါ ခံလိုက်ရတာဖြစ်ပါတယ်။ ဂိုးသမား အယ်လီဆန်အနေနဲ့ ဘရာဇီးကနေ ကလပ်အသင်းကို ပြန်ရောက်လာမှာ ဖြစ်ပြီး နောက်ထပ်ဆေးစစ်တာတွေ ပြုလုပ်မှာဖြစ်တယ်လို့ လီဗာပူးအသင်းက မတ်လ ၂၁ ရက်နေ့မှာ အတည်ပြု သွားခဲ့တာပါ။

ဘရာဇီးအသင်း ဆရာဝန်ရဲ့ ပြောကြားချက်အရတော့ အယ်လီဆန်ရဲ့ ထိခိုက်မှုက မပြင်းထန်သလို အသင်းဆေးအဖွဲ့အနေနဲ့လည်း စိတ်ချရတဲ့အထိ စောင့်ကြည့်တာတွေ ပြုလုပ်ပေးခဲ့တယ်လို့ သိရပါတယ်။ လူစားလဲလိုက်ရတာကတော့ ထိခိုက်မှုရဲ့ နောက်ဆက်တွဲကြောင့် အယ်လီဆန်ရဲ့ လှုပ်ရှားမှုတွေ နှေးလာသလို ထင်မိတာကြောင့်လို့ ဘရာဇီးအသင်းဆရာဝန်က ပြောပါတယ်။ လီဗာပူးအသင်းဟာ လာမယ့် ဧပြီလ ၂ ရက်မှာ အဲဗာတန်အသင်းနဲ့ ပရီးမီးယားလိဂ်ပွဲကို ကစားရမှာ ဖြစ်ပါတယ်။