လူငယ်တိုက်စစ်မှူး အန်းဒရစ်ခ်နဲ့ ပတ်သက်လို့ ရီးရဲလ်နည်းပြ အန်ဆလော့တီနဲ့ စကားပြောဆို ဆွေးနွေးမှုတွေ ပြုလုပ်ခဲ့တယ်လို့ ဘရာဇီးနည်းပြ ဒိုရီဗယ်ဂျူနီယာက ပြောကြားလိုက်ပါတယ်။ အသက် ၁၈ နှစ်အရွယ် အန်းဒရစ်ခ်ဟာ ဘရာဇီးအသင်းရဲ့ အနာဂတ်တိုက်စစ်မှူးအဖြစ် ညွှန်းဆိုခံထားရပေမယ့် ရီးရဲလ်အသင်းမှာ ပုံမှန်ပွဲထွက်ခွင့်ရဖို့ ရုန်းကန်နေရတာ ဖြစ်ပါတယ်။
အန်းဒရစ်ခ်ဟာ အခုရာသီမှာ ရီးရဲလ်အတွက် ၂၈ ပွဲသာ ကစားပေးခွင့်ရထားပြီး ၆ ဂိုးသာ သွင်းယူထားနိုင်သေးတာပါ။ အန်းဒရစ်ခ်ကိုယ်တိုင်ကလည်း ရီးရဲလ်အသင်းမှာ ကစားခွင့်နည်းပါးနေတာကြောင့် ၂၀၂၆ ကမ္ဘာ့ဖလားပြိုင်ပွဲကို ဘရာဇီးအသင်း ဝင်ပြိုင်ခွင့်ရခဲ့ရင် အသင်းလူစာရင်း ကနေ ချန်လှပ်ခံထားရမှာ စိုးရိမ်တယ်လို့ ဝန်ခံထားပါတယ်။ လက်ရှိ ကမ္ဘာ့ဖလားခြေစစ်ပွဲတွေ ယှဉ်ပြိုင်နေတဲ့ ဘရာဇီးအသင်းမှာ အန်းဒရစ်ခ် ပါဝင်နေတယ်ဆိုပေမယ့် ဒဏ်ရာကြောင့် နုတ်ထွက်သွားခဲ့တဲ့ နေမာရဲ့နေရာမှာ အစားထိုး ခေါ်ယူတာကို ခံထားရတာပါ။
အန်းဒရစ်ခ်က ပိုမိုရင့်ကျက်လာတယ်ဆိုပေမယ့် ပုံမှန်ကစားခွင့် နည်းပါးတဲ့ အခြေအနေကတော့ ကျေနပ်စရမဟုတ်ပါဘူးလို့ ဘရာဇီးနည်းပြ ဒိုရီဗယ်က ပြောသွားခဲ့ပါတယ်။ အန်းဒရစ်ခ်ဟာ ကိုလံဘီယာအသင်းကို အနိုင်ရတဲ့ပွဲမှာ အရန်စာရင်းမှာပဲ ပါဝင်ခဲ့တာဖြစ်ပြီး ကစားခွင့်မရခဲ့ပေမယ့် နည်းပြ ဒိုရီဗယ်ကတော့ အန်းဒရစ်ခ်ရဲ့ အချိန်တွေ ရောက်လာဦးမှာဖြစ်တယ်လို့ ပြောသွားခဲ့ပါတယ်။
