ဇန်နဝါရီဈေးကွက်မှာ ကစားသမားသစ် မခေါ်ယူနိုင်ခဲ့တဲ့အတွက် စိတ်ပျက်ရတယ်လို့ အာဆင်နယ် နည်းပြ အာတီတာက ပြောကြားလိုက်ပါတယ်။ တိုက်စစ်မှူး ဂျီးဆပ်ဟာ ဒဏ်ရာကြောင့် ရာသီကုန်အထိ နားရမှာဖြစ် သလို တောင်ပံတိုက်စစ်မှူး ဆာကာကလည်း ပြန်မကစားနိုင်သေးတာကြောင့် ဇန်နဝါရီဈေးကွက်မှာ အာဆင်နယ် အသင်းတိုက်စစ်ကို အင်အားဖြည့်တင်းလိမ့်မယ်လို့ မျှော်လင့်ခဲ့ကြတာပါ။
ဒါပေမဲ့ အပြောင်းအရွှေ့ပိတ်တဲ့ ဖေဖော်ဝါရီလ ၃ ရက်နေ့အထိ အာဆင်နယ်အသင်းအနေနဲ့ လူသစ်ခေါ်ယူမှု မလုပ်နိုင်ခဲ့ဘဲ ဒီအခြေအနေအပေါ် နည်းပြ အာတီတာ စိတ်ပျက်နေတာဖြစ်ပါတယ်။ အပြောင်းအရွှေ့ဖွင့်ချိန်မှာ အသင်းကို တိုးတက်မှုရှိနိုင်စေမယ့် ကစားသမားတွေကို ဦးစားပေးခေါ်ယူဖို့ ဆုံးဖြတ်ထားတယ်လို့ နယူးကာဆယ်အသင်းနဲ့ ကစားမယ့် လိဂ်ဖလား ဆီမီးဖိုင်နယ် ဒု-ကျော့ပွဲမတိုင်ခင်မှာ နည်းပြ အာတီတာက ပြောသွားခဲ့ဖူးပါတယ်။
နည်းပြအာတီတာကတော့ ဂျာမန်တိုက်စစ်မှူး ကိုင်ဟာဗက်ဇ်အနေနဲ့ အာဆင်နယ်တိုက်စစ်ရဲ့ လိုအပ်ချက်ကို ဖြည့်ဆည်းပေးနိုင်ဖို့ မျှော်လင့်နေတာပါ။ အာဆင်နယ်ဟာ ပြီးခဲ့တဲ့ ဇန်နဝါရီဈေးကွက်မှာ ဗီလာတိုက်စစ်မှူး ဝက်ကင်းစ်ကို ခေါ်ယူဖို့ ကမ်းလှမ်းခဲ့သေးပေမယ့် ဗီလာအသင်းဘက်က ပယ်ချခဲ့တာဖြစ်ပါတယ်။
