အင်္ဂါညက ကစားခဲ့တဲ့ တောင်အမေရိကဇုန် ကမ္ဘာ့ဖလားခြေစစ်ပွဲမှာ ဘိုလီဗီးယားအသင်းနဲ့ ဥရုဂွေးအသင်းတို့ ဂိုးမရှိ သရေကျပြီးနောက် ကမ္ဘာ့ချန်ပီယံ အာဂျင်တီးနားအသင်းဟာ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ခွင့်ရဖို့ကို သေချာ သွားခဲ့ပါတယ်။ ၂၀၂၂ ကာတာကမ္ဘာ့ဖလားပြိုင်ပွဲမှာ ချန်ပီယံဆုကိုရယူနိုင်ခဲ့တဲ့ အာဂျင်တီးနားအသင်းဟာ ၂၀၂၆ ကမ္ဘာ့ဖလားခြေစစ်ပွဲအဖြစ် ဘရာဇီးအသင်းနဲ့ မကစားခင်အထိ ၁၃ ပွဲကစားအပြီး ရမှတ် ၂၈ မှတ်နဲ့ ထိပ်ဆုံးမှာ ဦးဆောင်နေတာ ဖြစ်ပါတယ်။

ကမ္ဘာ့ဖလားပြိုင်ပွဲကို အသင်း ၆ သင်း တိုက်ရိုက်ဝင်ခွင့်ရမယ့် တောင်အမေရိက ဇုန်မှာ ခြေစစ်ပွဲကစားဖို့ ၄ ပွဲကျန်ချိန်မှာ အာဂျင်တီးနားအသင်းဟာ အဆင့် ၇ က ဘိုလီဗီးယားအသင်းနဲ့ ၁၄ မှတ်အထိ ကွာဟနေလို့ အခုလိုမျိုး ကမ္ဘာ့ဖလားကို တိုက်ရိုက်ဝင်ခွင့် သေချာသွားခဲ့တာဖြစ်ပါတယ်။ကမ္ဘာ့ဖလားကို တိုက်ရိုက်ဝင်ခွင့်ရရှိသွားပြီးဖြစ်ပေမယ့် အာဂျင်တီးနားအသင်းဟာ အခုမနက်အစောပိုင်းက ကစားခဲ့တဲ့ ခြေစစ်ပွဲမှာလည်း ဘရာဇီးအသင်းကို ၄ ဂိုး-၁ဂိုးနဲ့ ဂိုးပြတ်အနိုင်ယူပြီး အုပ်စုထိပ်ဆုံးနေရာမှာဆက်ရှိခဲ့ ပါတယ်။ ဥရုဂွေးနဲ့ သရေကျခဲ့တဲ့ ဘိုလီဗီးယားအသင်းကတော့ ပွဲစဉ် ၁၄ အပြီးမှာ ဗင်နီဇွဲလားအသင်းရဲ့ ကျော်တက်တာကို ခံခဲ့ရပြီး အဆင့် ၈ နေရာကို ဆင်းပေးလိုက်ရပါတယ်။