လာမယ့်နွေရာသီမှာ ရီးရဲလ်အသင်းဆီကို ပြောင်းဖို့ နီးစပ်နေပြီလို့ သတင်းတွေထွက်ပေါ်နေတဲ့ နောက်ခံလူ အာနိုးကို ရာသီလက်ကျန်ပွဲတွေမှာ အသုံးမပြုဖို့ လီဗာပူးပရိသတ်တွေက တောင်းဆိုခဲ့ကြပါတယ်။ လီဗာပူးအသင်း ကို ၆ နှစ်သားအရွယ်ကတည်းက ရောက်လာခဲ့ပြီး အသင်းအကယ်ဒမီကနေတစ်ဆင့် လီဗာပူးအသင်းကြီးမှာ ပွဲထွက်ခွင့် ရခဲ့တဲ့ အာနိုးဟာ ရာသီအကုန်မှာ အသင်းနဲ့စာချုပ်ပြည့်မှာ ဖြစ်ပါတယ်။
သတင်းတွေအရတော့ အာနိုးဟာ လီဗာပူးရဲ့ စာချုပ်သစ်ကမ်းလှမ်းမှုကို ငြင်းဆိုထားသလို ရာသီအကုန်မှာ ရီးရဲလ်အသင်းကို အလွတ် ပြောင်းရွှေ့ကြေးနဲ့ ပြောင်းဖို့ စီစဉ်နေတယ်လို့ သိရပါတယ်။ ပြီးခဲ့တဲ့ရက်ပိုင်းကတော့ အာနိုးနဲ့ ရီးရဲလ်အသင်းတို့ အကြား ဆွေးနွေးမှုတွေက နောက်ဆုံးအဆင့်ကို ရောက်နေပြီး အပြီးသတ်လက်မှတ်ထိုးဖို့ပဲ ကျန်တော့တယ်လို့ သတင်းတွေထွက်လာပြီးနောက် လီဗာပူးပရိသတ်တွေက အာနိုးကို အသင်းမှာ ကစားခွင့် ထပ်မပေးဖို့ တောင်းဆို သွားခဲ့ကြတာပါ။
တကယ်လို့ လီဗာပူးအသင်း ပရီးမီးယားလိဂ်ဖလားရခဲ့ရင်တောင် အာနိုးကို အောင်ပွဲခံမှုမှာ မထည့်သွင်းဖို့အထိ ပရိသတ်တွေက တောင်းဆိုသွားခဲ့တာဖြစ်ပါတယ်။ညာနောက်ခံလူ အာနိုးဟာ လီဗာပူးအသင်းအတွက် ပွဲပေါင်း ၃၄၉ ပွဲအထိ ကစားပေးထားပြီး လက်ရှိမှာတော့ ခြေကျင်းဝတ်ဒဏ်ရာကြောင့် ဧပြီလကုန်အထိ အနားယူရမယ်လို့ သိရပါတယ်။
