၂၀၂၆ အထိသာအသင်းနဲ့ စာချုပ်သက်တမ်းရှိနေတဲ့ နည်းပြ ဆီမိုနီ အင်ဇာဂီအနေနဲ့ မကြာခင်မှာ စာချုပ်သစ် ချုပ်ဆိုမယ်လို့ ယုံကြည်ကြောင်း အင်တာမီလန်အသင်း ဥက္ကဋ္ဌ မာရော့တာက ပြောကြားလိုက်ပါတယ်။ ၂၀၂၁ မေလ မှာ အင်တာမီလန်နည်းပြရာထူးကို ရယူခဲ့တဲ့ အင်ဇာဂီလက်ထက်မှာ အသင်းက တိုးတက်မှုတွေရှိခဲ့သလို အသင်းကို အင်ဇာဂီ ကိုင်တွယ်ခဲ့တဲ့ ပြိုင်ပွဲစုံ ၂၀၁ ပွဲမှာ ၁၃၄ ပွဲအထိ အနိုင်ရခဲ့တာဖြစ်ပါတယ်။
ပြီးခဲ့တဲ့ရာသီက အင်တာမီလန်အသင်းကို စီးရီးအေချန်ပီယံဆုရယူပေးခဲ့တဲ့ အင်ဇာဂီဟာ အသင်းနဲ့အတူ ကိုပါအီတာလီယာဖလား ၂ ကြိမ်နဲ့ အီတလီစူပါဖလားကို ၃ ကြိမ်ဆက်တိုက်ရယူပေးနိုင်ခဲ့တာဖြစ်ပါတယ်။ ဒါ့အပြင် ချန်ပီယံလိဂ် ပြိုင်ပွဲ မှာလည်း နည်းပြ အင်ဇာဂီဟာ အင်တာမီလန်အသင်းကို ၂၀၂၃ မှာဗိုလ်လုပွဲရောက်အောင် ဦးဆောင်ပေးထား နိုင်ခဲ့တာဖြစ်ပါတယ်။ နည်းပြအင်ဇာဂီလက်ထက်မှာ အသင်းက ရလဒ်ကောင်းတွေရနေသလို အသင်းနဲ့ ဆက်ဆံရေးကလည်း မိသားစုတွေလို ဖြစ်နေတာကြောင့် စာချုပ်သစ်ချုပ်ဆိုဖို့က မခက်ခဲလောက်ပါဘူးလို့ မာရော့တာက ပြောသွားခဲ့ပါတယ်။ အင်တာမီလန်အသင်းဟာ အခုရာသီစီးရီးအေမှာ သွင်းဂိုး ၆၅ ဂိုးနဲ့ တိုက်စစ် အကောင်းဆုံးအသင်းဖြစ်နေပေမယ့် ရာသီအကုန်မှာ တိုက်စစ်ကို ပိုမိုကောင်းမွန်လာစေဖို့အတွက် အားဖြည့်မှုတွေ ပြုလုပ်သွားမှာဖြစ်တယ်လို့လည်း မာရော့တာက ပြောသွားခဲ့ပါတယ်။
